• Ena session ordinària deth Plen deth Conselh Generau d’Aran celebrada aguest maitin, s’a aprovat iniciaument per unanimitat aguest pionèr Plan, qu’es ajuntaments e EMDs deth terrritòri poiràn aplicar segontes es sòns besonhs e prioritats, e qu’a coma objectiu principau garantir era regeneracion des peishèus e eth contròtle des poblacions d’arbilhons, atau coma previer eth risc d’incendis fortuits, suenhant atau des nòstes montanhes

 Eth Plen en session ordinària deth Conselh Generau d’Aran a aprovat per unaniminitat de forma iniciau eth Plan Estrategic de gestion sostenibla de regim de huec dera Val d’Aran.

“Er objectiu principau d’aguest Plan ei era regeneracion des peishèus e eth contròtle des poblacions d’arbilhons entà evitar ua omogeneïzacion progressiva deth paisatge, d’aguesta forma artenheram suenhar eth nòste auviatge naturau ath temps qu’evitam eth risc d’incendis fortuits” explicaue era sindica d’Aran, Maria Vergés, en tot híger que: “aguest Plan prepause ua metodologia pionera entà crear un marc de trabalh transversau e de consens en territòri en relacion ar usatge deth huec, afavorís era resiliéncia des nòstes montanhes e autreje ath nòste còs de Pompièrs un esturment de fòrça utilitat entà actuar deuant un incendi enes sectors especificadi en aguest document”.

En aguest sens, era sindica d’Aran a volut arregraïr tanben era “collaboracion e trabalh conjunt amiat a tèrme damb es ajuntaments e EMD deth nòste territòri en aguesta metèria”.

En aguest Plen, s’a aprovat tanben ua declaracion institucionau deth Conselh Generau d’Aran sus era guèrra en Ucraïna que condèmne de forma rotunda es atacs e eth desplegament militar deth govèrn rus e reclame era arturada immediata d’aguesti atacs qu’atempten contra era vida de milèrs de persones. En aguesta declaracion, era maxima institucion aranesa exprèsse tanben eth sòn supòrt, afècte e solidaritat ara populacion ucraniana e as nòsti vesins e vesies d’Ucraïna residents ena Val d’Aran, atau coma eth sòn supòrt incondicionau a quinsevolh actuacion damb objectiu de restablir era patz e era conviuença democratica, eth respècte ara legalitat e as drets umans.

Atau madeish, s’a aprovat tanben eth manifèst liegut eth 8 de març damb motiu deth Dia Internacionau dera Hemna coma simbèu deth compromís deth govèrn deth Conselh Generau d’Aran damb era luta pera igualtat.