Tecnics deth Departament de Territòri e Sostenibilitat, deth Còs d’Agents Ruraus, e Agents e Tecnics de Miei Ambient deth Conselh Generau d’Aran an participat en un operatiu especiau de captura der animau, dempús de que era setmana passada tornèsse entà Catalonha
S’a emplegat un elicoptèr entà apropar-se ar animau e endormir-lo, entà prener-li mòstres e cambiar-li eth colhar GPS, pr’amor qu’era bateria ère ath limit dera sua vida utila
Vielha, 17 d’octobre de 2018.- Tecnics deth Departament de Territòri e Sostenibilitat, deth Còs d’Agents Ruraus, e Agents e Tecnics de Miei Ambient deth Conselh Generau d’Aran, intervengueren ager en un dispositiu especiau de captura der os Goiat entà cambiar-li eth colhar de seguiment GPS, tau e coma ère previst.
Era intervencion, qu’auec lòc ena zòna de Naut Aran, s’amièc a tèrme damb eth supòrt dera unitat aeriana des Agents Ruraus. Mejançant un elicoptèr se podec efectuar eth seguiment visuau der animau, era manòbre d’aproximacion, atau coma eth tir damb rifle anestesic. Dempús de endormir-lo, es tecnics li treigueren mòstres, e li cambièren eth colhar, pr’amor qu’era bateria ère a punt d’agotar-se. D’aguesta manèra, eth seguiment GPS der animau demore garantit coma enquia ara.
Era captura s’a artenhut en dusau assag, dempús de que eth passat diuendres 12 se sagèc sense èxit. Ei eth prumèr còp enes Pirenèus que se realize ua captura d’os per mejans aeriani.
Se preve qu’enes pròplèus setmanes es ossi comencen eth periòde d’ibernacion, en tot coïncidir damb era baishada de temperatures. En parallel, se tramite, per part deth Ministèri e damb era participacion des comunitats autonòmes afectades, eth Protocòu d’intervencion e gestion d’ossi problematics enes Pirenèus. Se tracte d’un document tecnic e de consens qu’a de guidar era prena de decisions en aguest àmbit.
Des deth Conselh Generau d’Aran s’avalore fòrça positivaments aguesta accion qu’a de perméter mantier era localizacion der os Goiat, exemplar reintroducit en Pirenèu laguens eth Programa Pyroslife e auer coneishement des sòns movements en tot disposar d’ua informacion absoludaments de besonh entà completar eth protocòu que permete fin finau era sua extraccion deth miei.
Pendent eth temps que Goiat a estat en territòri francés e maugrat era demanda formulada peth Departament de Territòri e Sostenibilitat dera Generalitat de Catalonha, de realizar era operacion damb elicoptèr que s’a amiat a tèrme en Aran, França, non autorizèc era intervencion. Aguest ahèr tanben serà tractat enes reünions deth Grop Tranfronterèr der os damb es tecnics francesi.
Mentre Goiat a estat en França a atacat a 37 oelhes, un shivau abans der estiu, e 5 brinhons segontes confirmèren hònts deth govèrn francés.
Podetz descargar un vidèo ací https://drive.google.com/drive/mobile/folders/1U4wswaEydH_-L3L8KbWPeE9X-GF6evcZ?usp=sharing