Era sala polivalenta d’Es Bòrdes a acuelhut aué er acte solemne d’autrejament, per part deth secretari d’Estat de Memòria Democratica, Fernando Martínez López, e era sindica d’Aran, Maria Vergés, es certificats de reparacions as associacions des gerrilhèrs e as sues familhes.

Ath long dera dimenjada s’an hèt diuèrsi actes commemoratius qu’an compdat damb era collaboracion deth Conselh Generau d’Aran en ues jornades d’aumenatge damb era participacion des ajuntaments d’Es Bòrdes e Les.

Tara sindica d’Aran, Maria Vergés: “Era volontat deth govèrn d’Aran ei dignificar e méter en valor aguesta luta pr’amor qu’era Val d’Aran siguèc testimòni en prumèra linha d’aquèri hets qu’an d’èster visibles, en aguest aumenatge, dera man dera Generalitat de Catalunya e eth govèrn Espanhòl”.

A higut.” Ara fin se tracte d’acabar damb un procès de restitucion e normalizacion d’aqueres persones e entitats que lutèren per mantièr era democracia en Espanha, uns drets que, malerosament, a ores d’ara encara son en risc”.

Pendent er acte, eth secretari d’Estat de Memòria Democratica, a anonciat” qu’eth govèrn der Estat trabalharà entà poder declarar coma “Lòcs de Memòria” aqueri endrets deth nòste territòri a on s’amièren a tèrme aguesti episòdis destacadi dera istòria”.

Istoricament era “Operación Reconquista de España” auie coma un de sòns principaus objectius era aucupacion dera Val d’Aran, a on s’auie de plaçar eth govèrn dera Republica. D’aquiu plaçadi, se volie requerir as païsi aliats ara reconeishença internacionau, entà encetar eth procès d’isolament deth regim franquista e facilitar-ne era queiguda en contèxte dera imminenta des-hèta deth facisme en Euròpa.