• Era UAB a confirmat qu’es mòstres biologiques remassades pes Agents de Miei Ambient deth Conselh Generau d’Aran corresponen a un lop dera subespècia Canis lupus italicus, çò de mès probable ei que se tracte d’un mascle errant que se botje entre era Val de Benasc e eth Parc Nacionau d’Aigüestòrtes

Eth passat 15 de noveme, eth conductor d’ua maquina de trèir-nhèu que trabalhaue ena boca sud deth Tunèl de Vielha alertaue as Agents de Miei Ambient deth Conselh Generau d’Aran dera observacion d’un possible lop ena zòna.

Era Universitat Autònoma de Barcelona (UAB) a confirmat qu’era mòstra biologica remassada pes Agents de Miei Ambient aqueth dia ena zòna correspon a un lop d’estirp italiana corresponent ara subespècia Canis lupus italicus, ara demora encara dera identificacion individuau e sexatge der animau.

Era identificacion a estat possible gràcies as mòstres d’aurina retengudes ena nhèu e remassades pes tecnics deth Conselh Generau d’Aran ath cant dera N-230, lòc a on er animau profitèc entà mercar eth territòri.

Per ara, se considère que çò de mès probable ei que se tracte d’un mascle errant que se botje per un ample territòri, que pòt anar dera Val de Benasc enquiath Parc Nacionau d’Aigüestòrtes o mès enlà.

Cau rebrembar qu’era poblacion mès pròplèu d’aguesta subespècia se trape en Massís Centrau francés, d’a on se produsissen emissions de mascles expulsadi des manades locaus, que apareishen de forma esporadica enes Pirenèus.