• Diuèrsi indicis apunten que poirie tractar-se der os Goiat e actuaument s’an enviat mòstres ara Universitat Autònoma de Barcelona (UAB) entà sajar de confirmar era autoria d’aguesti atacs

• De confirmar-se que Goiat sigue ath darrèr d’aguest seguit d’atacs, pr’amor deth sòn istoriau conflictiu e anormaument depredador, eth Conselh Generau d’Aran iniciarie eth protocòl de captura entà tornar a localizar-le damb eth colièr GPS, que perdec en octobre der an passat

Aguesta dimenjada s’an confirmat dus naui atacs d’os. Eth prumèr auec lòc era net de dissabte a dimenge a pròp dera poblacion de Betlan, a on apareishec ua oelha mòrta. Eth dusau siguec notificat eth dimenge en Les, a on se traperen es cadavres de dues crabes qu’aurien estat atacades uns dies endarrèr.

“Aguest repunt d’atacs en Aran coincidís damb era disminucion d’atacs en ua zòna de França ena qué se sospitaue qu’ère er os Goiat”, explique eth conselhèr de Territòri, Paisatge e Gestion Ambientau, Francés Bruna, en tot híger que: “non ei descartable que darrèr d’aguesti atacs i sigue Goiat, per aguest motiu, auem remassat diuères mòstres qu’analizarà era Universitat Autonòma de Barcelona (UAB) entà que mos confirmen era sua preséncia en territòri”.

De confirmar-se qu’er autor d’aguesti atacs age estat aguest exemplar “deth Conselh Generau d’Aran ençà iniciaram un dispositiu de captura entà tornar a mercar-lo damb eth colièr GPS, atau e coma establís eth Protocòl d’Intervencion damb ossi enes Pirenèus”.

Aguesta epòca ei fòrça sensible en çò que hè as atacs d’ossi, pr’amor qu’encara manquen quauqui dies entà que comencen es agrupaments de ramats vigiladi damb pastor, ua mesura damb era qu’eth Conselh Generau d’Aran pretén disminuir eth nombre d’atacs, atau e coma s’a produsit en d’auti ans.

Eth conselhèr Bruna declaraue tanben “eth supòrt deth govèrn deth Conselh Generau ath sector ramadèr, ath quau auem sajat d’ajudar pendent eth darrèr an e miei damb mesures coma eth decrèt de danhs o era convocatòria d’ajudes ara ramaderia de montanha en zònes damb dificultats especiaus”.