• Dempús de dus ans de trabalh conjunt damb Ajuntaments e EMD, eth govèrn d’Aran constituic ager era Comission Forestau, er òrgan a trauès deth quau se desvoloparà era estrategia forestau dera Val d’Aran, qu’a coma objectiu arténher un profitament sostenible des nòsti recorsi naturaus e que permete afrontar es huecs de siesaua generacion ath madeish temps que s’apòste pera bioeconomia, era diversificacion economica e creacion d’emplec e er auanç entàs energies renauibles

• Aguesta Comission ei formada, ath delà de pera maxima institucion aranesa, pes Ajuntaments d’Arres, Bossòst, Es Bòrdes, Les, Naut Aran, Vielha e Mijaran e Vilamòs, atau coma es EMD d’Arró, Arròs e Vila, Arties e Garòs, Bagergue, Betren, Casau, Gausac e Unha

Ager ena tarde auec lòc ena sedença deth Conselh Generau d’Aran era constitucion dera Comission Forestau dera Val d’Aran, presidida pera sindica d’Aran, Maria Vergés, e eth conselhèr de Gestion Ambientau e Transicion Energetica, Oriol Sala, e a on sigueren presents es alcaldes e alcaldesses des municipis e pedanies que s’an higut ath projècte.

“Constituïr aguesta Comission, dempús de dus ans de trabalh intens, ei un pas istoric entath nòste territòri que mos permeterà plaçar-mos ara vanguàrdia dera adaptacion ath cambi climatic e dera transicion energetica”, asseguraue era sindica d’Aran, en tot híger que: “aguesta Comission a coma objectiu recuperar era gestion des recorsi forestaus de manèra conjunta entre eth Conselh Generau e es ajuntaments entà auançar ena disminucion dera peada de carbòni, era autosufisença energetica basada ena biomassa e es hilats de calor enes nòsti pòbles que permeten ua reduccion dera despena en energia autant des administracions coma dera ciutadania”.

Era estrategia forestau que desvoloparà aguesta Comission se base en un profitament sostenible des recorsi que permete, d’un costat, suenhar es nòstes montanhes e es nòsti bòsqui tà sajar d’esvitar aqueri huecs de siesaua generacion e, d’un aute costat, apostar pera bioeconomia, era diversificacion economica e es energies renauibles.

Ath delà dera maxima institucion aranesa, formen part d’aguesta Comission Forestau es Ajuntaments d’Arres, Bossòst, Es Bòrdes, Les, Naut Aran, Vielha e Mijaran e Vilamòs, atau coma es EMD d’Arró, Arròs e Vila, Arties e Garòs, Bagergue, Betren, Casau, Gausac e Unha. Eth conselhèr Sala manifestaue, en aguest sens, que: “deth govèrn d’Aran ençà volem trabalhar conjuntament damb es Ajuntaments e pedanies entà transitar cap a ua economia verda que serà indispensable entà balhar oportunitats ara gent deth territòri e que poguen auer accès a energies netes e a ua disminucion des còsti qu’era energia les supòse”.

Atau madeish, eth conselhèr Sala manifestaue que: “recuperar era gestion forestau ei clau entà arténher uns bòsqui mès resilents ath cambi climatic e as incendis forestaus, ath temps que podem generar ua economia verda ath torn des nòstes montanhes” e higie que: “aguest projècte de gestion forestau sostenible serà eth punt de partida entà gestionar es nòsti recorsi mejançat ua silvicultura activa, respectuosa damb era biodiveritat, era fauna e eth torisme, atau coma generadora d’activitat e lòcs de trabalh”.

Aguesta Comission compdarà damb un finançament de mès de 2 milions d’euròs a desvolopar en dus ans, finançadi per ajuts europèus e eth supòrt der Estat.