• Aguesta Comission entre eth Conselh Generau d’Aran e era Generalitat de Catalunya, constituïda oficiauments eth passat  dimèrcles, nèish der acòrd dera Comission Bilaterau tà arténher eth traspàs dera competència en matèria d’espòrts que mandata era Lei de Regim Especiau d’Aran

Eth passat dimèrcles, 31 de gèr, auec lòc era amassada de constitucion dera Comission d’estudi deth traspàs en matèria d’espòrts, entre eth govèrn d’Aran e era Generalitat de Catalunya.

“Ena darrèra Comission Bilaterau entre eth Conselh Generau e era Generalitat artenherem eth compromís dera Generalitat tath traspàs dera competéncia d’espòrts”, afirmaue era sindica d’Aran, Maria Vergés, en tot híger que: “enquia ara era Val d’Aran non auie encetat es trabalhs tà desplegar çò qu’era Lei d’Aran mandate en materia d’espòrts e, per tant, non an existit es recorsi ne competéncies de besonh entà desvolopar politiques e accions que mos permeten gestionar un airau de tanta importància en nòste territòri, e a trauès d’aguesta Comission d’estudi començam a méter en foncionament eth mecanisme entà assomir aguest traspàs”.

Atau madeish, eth conselhèr d’Espòrts, Javier Cavero, asseguraue que: “deth govèrn d’Aran ençà auem er objectiu de desvolopar ath maxim aguesta competéncia entà promocionar e impulsar er espòrt en Aran en totes es sues dimensions”.