Se constituís eth nau Conselh Generau d’Aran

Paco Boya a estat elegit sindic d’Aran

Er acte a compdat damb era preséncia dera delegada deth Govèrn en Catalonha, Teresa Cunillera e deth secretari d’Administracions Locaus e Relacions damb Aran, Miquel Àngel Escobar

Vielha, 18 de junh de 2019.- Era Casa deth Senhor d’Arròs a acuelhut aué er acte de constitucion deth nau Conselh Generau d’Aran e dera prèssa de possession des naui conselhèrs e conselhères qu’an elegit ath nau sindic d’Aran, Paco Boya d’UA-PSC-CP.

Er acte tanben a compdat damb era preséncia de Miquel Iceta, deputat deth Parlament de Catalonha; José Crespín, sosdelegat deth Govèrn en Lhèida, Rosa Vestit, directora generau d’Administracions Locaus dera Generalitat; Marcelino Iglesias, senador des Corts Generaus; e Miguel García Ferrer, president dera Deputacion de Huesca, entre d’auti convidadi.

Ena sua intervencion era delegada deth Govèrn en Catalonha, Teresa Cunillera a destacat era fòrta implicacion damb er Aran e damb tot eth Pirenèu deth sindic d’Aran, Paco Boya, de qui a dit que començaràn a trabalhar amassa dempús d’aué madeish en aspèctes importants coma era milhora dera carretèra N-230. Cunillera a aufrit era collaboracion deth Govèrn d’Espanha en benefici deth benéster e eth progrès des vesins e vesies der Aran.

Eth sindic d’Aran, Paco Boya, que ja aucupèc eth cargue deth 2007 ath 2011, s’a referit en sòn discors ara Val d’Aran coma “tèrra de progrès que totun, s’afronte a rèptes complèxi e qu’exigiràn ço de milhor de nosati entà hèr possible eth futur que desiram”. Eth sindic d’Aran a ahijut que “volerie demanar tanben, en uns tempsi tan complèxes des deth punt de vista politic, qu’es nòstes administracions, amassa damb es persones que les entesten, hèsquen dera leiautat institucionau e deth servici as ciutadans ua maxima que mos permeter auançar enes propòsits de milhora e transformacion des nòstes societats, en tot auer eth dialòg coma instrument fondamentau dera política”.

Pendent era sua intervencion Paco Boya a manifestat qu’enquia aué “s’a ja hèt força camin e ei important saber que mos afrontam a un rèpte extraordinari, damb illusion e ganes de servir ath nòste país e ara nòsta gent. Per que fin finau un país viu en còr dera sua gent, d’aqueri que l’estimen e que cada dia le hèn possible”.

En declaracions as mieis de comunicacion eth sindic d’Aran a explicat qu’es prioritats deth sòn Govèrn an a veir damb era sanitat, era gestion dera recuelhuda de lordères e era gestion deth miei ambient en orde intèrn e naues que passen pera gestion forestau, era innovacion, eth supòrt as pagesi e damb era retencion deth talent des mès joeni en territòri.

Cossent damb es resultats des eleccions deth passat 26 de mai, era composicion deth Conselh sorgida des urnes ei era següenta: 9 conselhèrs d’UA-PSC-CP e 4 conselhèrs de CDA-PNA.

Eth Conselh Generau d’Aran estarà format per 13 conselhèrs distribuïdi enes sies terçons istorics:

Terçon de Pujòlo. 2 membres:

-Mgfc. Sr. Francisco Bruna Capel (UA-PSC- CP)

-Mgfc. Sr. César Ruiz- Canela Nieto (CDA- PNA)

Terçon d’Arties e Garòs. 2 membres:

-Mgfc. Sr. José Canut Herraiz (UA-PSC-CP)

-Mgfc. Sr. Òscar Canut Cònsul (CDA-PNA)

Terçon de Castièro. 4 membres:

-Mgfc. Sr. Juan Antonio Serrano Iglesias (UA-PSC-CP)

-Mgfca. Sra. Maria Vergés Pérez (UA-PSC-CP)

-Mgfca. Sra. Àngela Cases Andreu (UA-PSC-CP)

-Mgfca. Sra. Rosa Maria Salgueiro Pujòs (CDA-PNA)