• Aguesta iniciativa ei frut des diuèrses entrevistes e amassades qu’era conselhèra d’Igualtat, Salut e Benèster, Maria Vergés, amièc a tèrme eth passat ostiu damb es professionaus sanitaris

• Damb aguesta mesura se pretén empoderar as professionaus entà que participen, propòsen e meten en practica aqueres accions, cambis e iniciatives que considèren de besonh entath bon foncionament, autant a nivèu intèrn coma per çò que hè ara qualitat assistenciau des sòns airaus

• Per prumèr viatge er Espitau Val d’Aran compdarà damb aguest òrgan collegiat de participacion e assessorament des professionaus der airau d’infirmeria d’Aran Salut (Conselh Generau d’Aran) e, ath madeish temps, recupère era Junta Facultativa d’aguest espitau qu’auie deishat de funcionar temps endarrèr

Ua des accions qu’eth govèrn deth Conselh Generau d’Aran a metut en foncionament en airau sanitari pendent aguesti prumèri sèt mesi de legislatura a estat era creacion dera Junta d’Infirmeria der Espitau Val d’Aran.

Aguesta Junta ei un òrgan collegiat de participacion e representacion deth collectiu d’infirmeria que nèish entà velhar pera qualitat assistenciau atau coma entà proposar e assessorar ena planificacion, organizacion e gestion d’aguest airau. En formen part representants dera direccion der espitau (damb veu mès sense vòt) e representants deth personau d’infirmeria. Eth foncionament d’aguesta Junta ven regulat per un reglament intèrn definit pes pròpris membres d’aguest òrgan.

N’aguesta madeisha linha s’a reactivat era Junta Facultativa, qu’ei tanben un òrgan collegiat e de participacion des professionaus facultatius der Espitau Val d’Aran. Es foncions d’aguest òrgan son tanben es de velhar pera qualitat dera assisténcia mediacu que prèste er Espitau atau coma prepausar e assessorar ara direccion medicau deth centre.

“Dempús des nombroses entrevistes que realizè pendent er ostiu passat damb toti aqueri professionaus sanitaris qu’ac sollicitèren, ua des conclusions des madeishes siguec eth besonh d’empoderar as professionaus sanitaris entà que participen de manèra dirècta ena gestion assistenciau e en foncionament intèrn des sòns airaus. E pr’amor d’açò auem creat aguesti dus òrgans” declaraue era conselhèra d’igualtat, salut e benèster, Maria Vergés.

N’aguest sens Vergés tanben manifestaue que “aguest ei sonque ua des diuèrsi cambis que dejà s’an implementat en espitau Val d’Aran, frut coma digui des demanes des professionaus. En poderíem destacar d’auti, fòrça reclamadi pendent es ans, coma per exemple eth refòrç der airau de radiologia, que permet redusir era pression sus es professionaus tant d’aguest airau coma deth servici d’urgéncies, o era reestructuracion der airau d’atencion primària”.