• Eth periòde obrant generau de pesca comence eth dia 1 d’abriu de 2017 e finalize eth 31 d’agost de 2017, andús inclodidi.
Foto Archiu: Societat de Caça e Pesca dera Val d’Aran
Eth Conselh de Govèrn del Conselh Generau d’Aran, en session ordinària de 20 de març de 2017, aprovèc eth Plan Especific de Pesca dera Val d’Aran, sason 2017, enes tèrmes qu’ara seguida s’especifiquen:
1) Periòdes obrants. Eth periòde àbil generau de pesca comence eth dia 1 d’abriu de 2017 e finalize eth 31 d’agost de 2017, andús inclodidi, damb es excepcions que se nomenten ara seguida:
– Enes lacs de nauta montanha, comence eth dia 28 de mai de 2017 (sonque s’era major part deth lac ei desgelat) e s’acabe eth dia 30 de seteme de 2017.
– Ena zòna de pesca controtlada dera bassa d’Aiguamòg: comence er 1 de mai de 2017 (sonque s’era major part dera bassa ei desgelada) e s’acabe eth dia 30 de seteme de 2017.
– Enes arrius de nauta montanha (Arriu Malo, Ruda, Aiguamòg, Valarties, Noguera Ribagorçana e Noguera Pallaresa) comence er 1 de mai de 2017 e s’acabe eth dia 31 d’agost de 2017.
-Enes trams sense mòrt: comence eth dia 1 d’abriu e finalize eth 30 de seteme.
2) Trams vedats o refugis de pesca.
– Sonque se poirà realizar era activitat dera pesca enes trams d’arrius abilitats a tal efecte e publicats enes mapes editats peth Conselh Generau d’Aran, que cònsten ena relacion annèxa ara presenta ordre de vedes. Era rèsta de trams son considerats vedats de pesca.
– Coma conseqüéncia dera excepcionalitat des aiguats deth 18 de junh de 2013, pr’amor qu’es densitats de trueita dempús dera riada non son sufisentes entà perméter era activitat piscicòla, s’a vedat eth tram dera Garona en municipi de Naut Aran.
– Enes zònes de pesca de lacs e basses de nauta montanha, enes trams d’aigües correntes existentes entre desparièrs lacs, non se permet era pesca e se consideren, donc, vedats de pesca.
3) Ams e esques.
– Ei proïbida exprèssament era pesca tamb quinsevolh espècia de peish naturau viu o mòrt.
– Es tipes d’esques permetudi son condicionats pera qualificacion deth tram:
a) Pesca sense mòrt: es esques permetudi son:
– Esques artificiaus: culheretes e coa de rata, tamb sonque un am e sense arponet (o arponet esclafat)
b) D’auti trams:
– Esques artificiaus: culheretes, ninfes, mosques, peishi o bèsties imitades o simulades e quinsevolh aute de natura similara, arponet permetut.
– Esques naturaus: vèrme de tèrra (anellids), vèrme de mèu o tenia (Galleria mellaeonnella), vèrmes de fonda, vèrmes d’arriu, dragues o pèrles (efemeroptèrs, tricoptèrs, plecoptèrs, ortoptèrs), sautamartin e mosques adultes, tamb sonque un am e arponet permetut. Es ganchets que se permeten son es includits entre es mesures num. 1 (un), e 10 (dètz), andús includidi.
4) Talhes autorizades. Damb era finalitat de preservar es fraccions d’edat reporductores des corsi fluviaus, non s’establís talha minima de captura. Es talhes màximes (mesura a partir dera quau cau retornar eth peish ar arriu) son:
– Arriu Garona: trenta centimètres (30 cm).
– Afluents lateraus e arrius de montanha (inclodida bassa d’Aiguamòg): vint-e-dus centimètres (22 cm).
– Lacs e embassaments: sense talha.
5) Numerò maximum de captures autorizades. Eth numerò maximum de captures autorizades per pescaire e dia ei proporcionau ara densitat de trueita actuau respècte ara densitat istorica, çò qu’ei:
– Arriu Garona: quate (4) captures/pescaire e dia
– Afluents lateraus e arrius de montanha (inclodís embassament d’Aiguamòg): cinc (5) captures/pescador e dia
– Lacs e estanhs: dotze (12) captures/pescador e dia.
6) Captura d’espècies alloctònes. Se permet era captura sense limit de talhes ne quòta de captura dera trueita irisada (Oncorhynchus mykiss) e deth salvelin (Salvelinus fontinalis). En vertut dera disposicion transitòria dusau deth Reiau Decret 630/2013, de 2 d’agost, peth quau se regule eth Catalòg espanhòu d’espècies exotiques invasores catalogades, es espècies catalogades introdusides en miei naturau damb anterioritat ara entrada en vigor dera Lei 42/2007, deth 13 de deseme, pòden èster objècte de profitament piscicòla, damb er objectiu de controtlar e erradicar es sues poblacions. En supòsit qu’un airau de pesca controtlada o un airau liure sense mòrt inclodisque un d’aguesti trams, eth profitament pesquer s’aplicarà en tot er airau.
7) Tot çò que non prevé aguest Plan especific de pesca serà regulat per Resolucion ARP/399/2017, de 14 de hereuèr, pera quau s’ordène era pesca enes aigües continentaus de Catalonha pendent era tempsada 2017 [DOGC num. 7324 de 08.03.2017] e pera Lei 22/2009, de 23 de deseme, d’ordenacion sostenibla dera pesca en aigües continentaus.
Vielha, 31 de març de 2017
Conselh Generau d’Aran: Núria Sanjuan