• Se tracte deth gahús petit, localizat pendent un cens hèt entre eth Conselh Generau e era Generalitat de Catalunya, entre er iuèrn e era primauera deth 2023, prumèr exemplar d’aguesta espècia detectat en Catalonha.

En un estudi hèt amassa entre eth Conselh Generau d’Aran, a trauès deth sòn departament de Miei Ambient, e era Generalitat de Catalunya, s’a detectat era preséncia en Aran d’ua naua espècia de gahús pirenenc, coneishut coma gahús petit, eth prumèr exemplar vist en Catalonha.

Eth nau exemplar se detectèc pendent un estudi hèt entre er iuèrn e era primauera deth 2023 mejançant era installacion de gravadores automatiques d’àudio distribuïdes per tot eth Pirenèu catalan, qu’enregistren es sons deth bòsc en crepuscul e ena auba, un sistèma que permet posteriorament analisar es bèsties que coabiten en aguest ecosistèma, un metòde cada viatge mès comun entà localizar animaus nocturns en zònes de condicions de mau recensar.

Er enregistrament deth 2023 se verifiquèc en 2024, a on se podec demostrar era existéncia deth gahús petit en madeish endret qu’en darrèr estudi.

Imatges cedides per: Juan Carlos Albero (Pirenèu aragonés)

Damb era preséncia d’aguesta naua espècia d’audèth s’a determinat, en ua prumèra avaloracion, que ven des Aups, a on ei en expansion. Era sua descubèrta en abitat aranés ja se demoraue dempús d’auer estat detectada enes darrèri ans ena Catalunya Nòrd, e en Aragon en 2021.

Aquesta espècia viu en bòsqui de montanha a on se tròben d’autes espècies d’audèths menaçadi, com ei eth cas deth paom o dera gauèca pirenenca, fòrça sensibles ara preséncia umana en iuèrn e en epòca de nidificacion, per aquerò ei important respectar aguesti abitats entà non shordar-les.

Vielha, 30 de gèr 2025