• A compdar d’aué, es usatgèrs e usatgères d’aguest servici tornen a repréner es sues activitats grupaus en tot seguir es mesures de seguretat establides pes autoritats sanitaries

Dempús de dus mesi barrat pr’amor dera situacion COVID-19, eth Centre de Dia dera Residéncia Sant Antòni a reprenut aué era sua activitat.

“Gràcies ara catalogacion coma residéncia verda dera Residéncia Sant Antòni hè dues setmanes, auem podut tornar a repréner eth servici deth Centre de Dia, çò que supause ua notícia fòrça positiva entàs sòns usatgèrs e usatgères, pr’amor que recupèren ua part dera sua rotina qu’ei fòrça important entara sua salut mentau e emocionau”, afirmaue era sindica d’Aran, Maria Vergés.

Es usatgèrs e usatgères d’aguest Centre recuperen es sues activitats grupaus en tot seguir es mesures de seguretat establides pes autoritats sanitàries (distància, igiena e masqueta).

En aguesti moments, era totalitat d’usatgèrs d’aguest servici, autant coma es residents dera Residéncia Sant Antòni, an recebut dejà es dues dòsis dera vacuna contra era COVID-19.