• Ath torn d’ua quinzea d’establiments otelèrs e de restauracion aranesi collabòren damb eth Camin de Santiago Aran-Pirenèus, que portarà as pelegrins de Sant Bertrand de Comminges, en tot trauessar era Val d’Aran, era Alta Ribagorça e Òsca enquia connectar damb eth Camin de Santiago catalan, ua iniciativa qu’a estat prebotjada peth Conselh Generau d’Aran, era Communauté de Communes Pyrénées Haut Garonnaises, eth Consell Comarcal de l’Alta Ribagorça e era Diputación Provincial de Huesca

Eth Conselh Generau d’Aran, a trauès de Foment Torisme Val d’Aran, autrjarà pendent es pròplèu dies as establiments aderits ara iniciativa deth Camin de Santiago Aran-Pirenèus es plaques que les identifiquen coma Establiments Amics deth Camin de Santiago.

“Era idea de recuperar aguest camin desbrembat pes pelegrins, mès qu’a mantengut era connexion entre es territòris vesins, se presènte coma ua naua oportunitat de desvolopament toristic dehòra dera sason d’iuèrn entath nòste territòri”, afirme eth vicesindic e conselhèr d’Economia, Torisme e Promocion Economica, Juan Antonio Serrano, en tot híger que “eth Camin de Santiago compde damb un gran reconeishement e prestigi a nivèu mondiau e er hèt d’auer ua rota d’aguest camin que trauesse era Val d’Aran mos place en mapa de fòrça pelegrins e supause un important impuls que mos pòt ajudar tanben a diversificar era nòsta economia”.

Pera sua part, eth tanben conselhèr d’Economia, Torisme e Promocion Economica, Josep Canut, manifestaue que: “deth govèrn deth Conselh Generau d’Aran ençà volem dar es gràcies ara Associacion Amics deth Camin de Santiago dera Val d’Aran e en concret a Ignacio Aldea, e as defunts José Antonio Martínez Íñigo e era sua hemna Maribel, que siguèren es prepulsors iniciaus d’aguest projècte, atau coma ara Associacion Volentaris Val d’Aran peth trabalh qu’an desvolopat entà hèr realitat aguest Camin”.

Eth Camin de Sant Jaime Aran Pirenèus, que va de Saint Bertrand de Comminges a Berbegal en tot recórrer era Val d’Aran pes municipis de Les, Bossòst, Es Bòrdes e Vielha, cònste de 14 etapes  que somen 246,50 km de recorrut cargadi d’istòria.

Er itinerari ei totaument senhalizat damb es marques de Gran Recorrut, GR-11 e es sues variants ena Val d’Aran, e GR-17 enes trams dera Alta Ribagorça catalana e Òsca.