- Eth Conselh Generau d’Aran e era empresa Fomento Construcciones y Contratas (FCC) an signat, ena sedença deth govèrn aranés, eth nau contracte mixte de remassada e evacuacion de lordères en territòri per un periòde de 8 ans mès dus de prorogables.
Era sindica d’Aran, Maria Vergés, e eth director dera Delegacion de Catalunya II de FCC Medio-Ambiente, Miquel Àngel Quero, signauen ager, ena sedença deth Conselh Generau d’Aran, eth nau contracte mixte deth servici integrau dera remassada e evacuacion de residus dera Val d’Aran e eth servici de redaccion deth projècte executiu e execucion des òbres d’adeqüacion deth centre de transferéncia de residus.
FCC aquerís eth compromés entara gestion deth nau modèl de tractament de residus, que combinarà era remassada pòrta per pòrta damb es ièrles barrades, tàs quaus se poderà accedir damb era identificacion des usatgèrs e usatgères, un servici que s’implementarà de manèra progressiva sus eth modèl adaptat ara naua normativa europèa, qu’a d’èster de plen compliment tath 2050.
Atau donc, eth sistèma s’anarà implementant progressivaments e eth govèrn d’Aran prevé encetar ua prumèra fasa d’implementacion d’aguest nau modèl destinada as grani productors que permeterà redusir en prumèra instància eth volum de rèsta e aumentar per tant eth reciclatge. Mès entà deuant eth sistèma s’anarà implementant entà tota era ciutadania.
Tath conselhèr de Gestion Ambientau e Transicion Energetica, Oriol Sala: “damb aguest nau modèl que desvoloparà era naua adjudicatària implementaram eth sistèma començant damb eth pòrta per pòrta damb grani productors de residus, tà implementar atau eth volum de remassada e sajar de deishar d’èster es darrèrs de Catalonha, cercant d’arténher ua optimizacion dera remassada de lordères”.
Tara sindica d’Aran, Maria Vergés: “Entath govern d’Aran supòse ua hita fòrça importanta, pr’amor que mos a de perméter desvolopar aguest nau modèl de remassada entà meter-mos ath dia ena gestion sostenibla des residus e sajar, d’ara enquiath 2030, de mantier aqueri paramètres de reciclatge e produccion qu’era normativa europèa requerís”. E higie: “Ath delà d’adaptar eth territòri ath besonh imperant d‘èster sostenibles ambientaument, economicament e sociaument, que revertirà ena imatge deth país e que servisque de referent en aguest sector”.
Vielha, 16 d’octobre 2024