• En tot seguir eth plan de vacunacion definit peth departament de Salut dera Generalitat, aué se comencen a administrar es prumères dòsis dera vacuna de Pfizer-BioNTech as persones majors de 80 ans, damb un naut grad de dependéncia e adscrits ath programa d’Atencion Domiciliària e, parallèlament, se contunharà damb era administracion dera vacuna d’AstraZeneca/ Oxford ath professorat dera Val d’Aran

A compdar d’aguest maitin e pendent es pròplèu dies, en tot seguir eth plan de vacunacion gestionat peth Departament de Salut dera Generalitat, s’inície era campanha de vacunacion contra era COVID-19 destinada as persones majors de 80 ans damb un naut grad de dependéncia e que son adscrits ath programa d’Atencion Domiciliària der Espitau Val d’Aran.

“Auem recebut 120 dòsis dera vacuna de Pfizer-BioNTech per part deth Departament de Salut, e a compdar d’aué se començarà a administrar as persones depenents majors de 80 ans”, explicaue era sindica d’Aran, Maria Vergés, en tot híger que: “es professionaus d’Atencion Primària d’Aran Salut se meteràn en contacte damb aqueres persones que cònsten en sòn programa d’Atencion Domiciliària entà citar-les, e era vacunacion s’amiarà a tèrme en centre de joenessa Antara der Ajuntament de Vielha e Mijaran, a qui volem arregraïr era sua collaboracion en aguest prètzhèt”.

En cas des persones que non se poguen desplaçar: “er airau d’Atencion Primària dejà estúdie amiar a tèrme era vacunacion domiciliària, mès ei de besonh rebrembar qu’aguesta vacuna en concrèt ei sensible as moviments e qu’ei recomanat evitar qu’es viaus s’agiten, ei per aguest motiu qu’auem escuelhut un espaci concrèt entara vacunacion des persones en condicions entà desplaçar-se”.

Parallèlament ara vacunacion des grani depenents majors de 80, se contunharà tanben damb era administracion dera vacuna d’AstraZeneca/ Oxford as docents des centres educatius dera Val d’Aran, que comencèc era passada setmana. En aguest cas, ei eth pròpri Departament de Salut qui cite via SMS ath professorat.

Enquiath moment, en tot seguir eth plan de vacunacion establit pes autoritats sanitàries, ena Val d’Aran s’an administrat vacunes contra era COVID-19 as següents grops:

• Usatgèrs e usatgères dera Residéncia Sant Antòni e centre de dia: an recebut es dues dòsis dera vacuna de Pfizer-BioNTech.
• Personau sanitari e essenciau dera Residéncia e er Espitau Val d’Aran, atau coma transpòrt sanitari: an recebut es dues dòsis dera vacuna de Pfizer-BioNTech.
• Personau sanitari de dusau linha e personau essenciau (entre eri, eth professorat): vacunacion en cors damb era administracion dera prumèra dòsi dera vacuna d’AstraZeneca/ Oxford.
• Grani depenents majors de 80 ans: vacunacion en cors damb era administracion dera prumèra dòsi dera vacuna de Pfizer-BioNTech.