• Er “Ecocentro Bioleta” ei eth projècte aranés seleccionat en aguest Matchfunding, un espaci a on apréner a consumir de forma sostenible basat ena ecologia e eth comèrç just e de km0, ath que dejà se pòt ajudar damb donacions a trauès dera plataforma Goteo

Ja a començat era campanha de crowdfunding ena plataforma Goteo des projèctes seleccionadi en ‘Matchfunding Arraïtza-te Naut Pirenèu e Aran”. Se tracte d’ua convocatòria de finançament collectiu mixta, ena quau es administracions publiques complementaràn es aportacions que hè era ciutadania a trauès deth micromecenatge, en tot aportar un eurò per cada euro requectat, en tot multiplicar atau es hons.

En aguesta prumèra edicion se compde damb un hons public de 24.000 euròs entà activar es sies projèctes seleccionadi, que an coma objectiu un impacte positiu e un retorn sociau en territòri.

Eth projècte escuelhut ena Val d’Aran a estat er “Ecocentro Bioleta”, un espaci a on aprenér a consumir de forma sostenible, etica e saludable, un projècte d’alimentacion, corsi, activitats e d’auti productes basat ena ecologia e eth comèrç just e de km0.

Aguesta iniciativa a estat prebotjada peth Conselh Generau d’Aran e es Conselhs Comarcaus dera Alta Ribagorça, Alt Urgell, Cerdanya, Pallars Jussà e Pallars Sobirà, es servicis de promocion economica e trabalh d’aguestes institucions, es Oficines de Joenessa, er Ateneu Cooperatiu deth Naut Pirenèu e Aran e eth projècte Odisseu, damb eth supòrt dera Deputacion de Lleida, Deputacion de Girona, er Institut entath Desvolopament e era Promocion deth Naut Pirenèu e Aran (IDAPA), era DG de Joenessa, eth Consòrci GAL Alt Urgell – Cerdanya e eth Consòrci Leader Pirenèu Occidentau.