• Aguesti trabalhs de restauracion son frut deth convèni de collaboracion signat eth passat mes d’agost entre eth govèrn deth Conselh Generau d’Aran e er Ajuntament de Bossòst

Dejà an començat es òbres d’assolidament en campanau romanic dera glèisa dera Mair de Diu dera Purificacion de Bossòst, atau e coma s’acordèc en convèni entre eth govèrn d’Aran e er Ajuntament de Bossòst, signat eth passat mes d’agost.

“Era conservacion e proteccion deth nòste auviatge ei primordiau entath govèrn deth Conselh Generau d’Aran”, afirmaue eth sindic d’Aran, Francés Boya, en tot híger que: “era glèisa dera Mair de Diu dera Purificacion, que siguec declarada Ben Culturau d’Interès Nacionau en 2015, constituís un des melhors exemples dera arquitectura romanica aranesa deth sègle XII e supause entà Aran un gran tresaur culturau qu’ei de besonh suenhar”.

“Aguest projècte d’assolidament, que  siguec redactat pes tecnics deth Conselh Generau d’Aran, prevé eliminar es causes que provòquen es actuaus patologies dera bastissa, damb er objectiu de recuperar era sua coesion”, explicaue er alcalde de Bossòst, Amador Marqués, en tot híger que: “s’actuarà sus es henerècles que presente era estructura deth campanar mès tanben sus era estructura de husta que date deth sègle XVIII e qu’ei fòrça deteriorada”.

Des lèu 150.000 euròs que s’invertiràn en aguestes actuacions d’assolidament deth campanau, eth Conselh Generau d’Aran, laguens deth sòn convèni marc damb era Deputacion de Lleida, n’aportarà 94.000, er Ajuntament de Bossòst aportarà 18.000 euròs e eth Departament de Cultura dera Generalitat 35.000. Es trabalhs seran amiadi a tèrme pera empresa especialitzada CYRESPA.