• Era sindica d’Aran e eth conselhèr de Governacion s’an amassat telematicament aguest maitin damb era directora dera Agéncia der Abitatge de Catalunya entà iniciar es trabalhs de constitucion d’aguesta Taula der Abitatge

• En aguest sens, eth govèrn d’Aran seguís trabalhant en sòn Plan d’Abitatge, per miei deth quau se desvoloparà ua diagnòsi que permete impulsar politiques d’abitatge que melhoren era actuau situacion

Era sindica d’Aran, Maria Vergés, e eth conselhèr de Governacion, Amador Marqués, s’an amassat telematicament aguest maitin damb era directora dera Agéncia der Abitatge de Catalunya, Sílvia Grau, damb qui an iniciat es trabalhs entà constituir era Taula der Abitatge en Aran.

“Eth passat mes de hereuèr ja trasladèrem ath conselhèr de Territòri era nòsta preocupacion deuant dera grèu situacion de manca de viuenda assequibla en Aran e acordèrem era creacion d’aguesta Taula der Abitatge entà cercar solucions urgentes en aguesta qüestion de forma coordinada damb era Generalitat de Catalunya, qu’ei a qui correspon era competéncia exclusiva en matèria d’abitatge”, afirmaue era sindica d’Aran.

Deuant aguesta problematica, eth govèrn d’Aran elabòre tanben eth sòn Plan d’Abitatge, ena ena linha deth Plan Sectoriau d’Abitatge dera Generalitat e que se realize damb era collaboracion dera majoria des Ajuntaments dera Val d’Aran, e per miei deth quau se desvoloparà ua diagnòsi que permete impulsar politiques d’abitatge que melhoren era actuau situacion.

Totun, era sindica d’Aran a manifestat que: “ei de besonh ampliar es nòstes competéncies en aguest ambit e que siguen dotades economicaments coma cau, entà desvolopar politiques que faciliten er accès dera nòsta ciutadania a ua viuenda digna e accessible pr’amor que non cau desbrembar que, atau e coma mèrque er article 137 der Estatut d’Autonomia de Catalunya, era competéncia exclusiva en matèria d’abitatge correspon ara Generalitat”.