• Aguesta dusau fasa a de servir entà hèr es òbres d’adaptacion des espacis interiors tà complir damb era normativa vigenta, melhorar eth confòrt des usatgèrs e adequar er entorn der edifici
• Entà dessenhar aguestes adaptacions s’a auut de redirigir un Plan Foncionau d’aguest equipament que permeterà desvolopar-ne era gestion
• Atau madeish, se licitarà tanben eth suministre de tot er equipament e mobiliari entara metuda en foncionament d’aguesta residéncia

Eth Conselh Generau d’Aran amie a tèrme pendent aguesti dies es tràmits entà que pogue licitar-se era dusau darrèra fasa des òbres dera residéncia de gent grana de Les. Ara fin d’aguest mes de mai ei prevista era entrèga des trabalhs iniciaus qu’an patit un important retard pr’amor de diuèrsi imprevisti relacionadi damb es suministres de lum, gas e telefonia.

Damb era entrega d’aguesta fasa, s’amiarà a tèrme era licitacion dera darrèra part des trabalhs de besonh entà un equipament d’aguestes caracteristiques, que non èren previsti ena òbra iniciau, e que son un requeriment entà assegurar eth compliment dera normativa e eth confòrt des usatgèrs. Concretaments, es trabalhs de reforma interiora serviran entà milhorar era foncionalitat der equipament mejançant era inclusion, laguens dera pròpria residéncia, de naui espacis assistenciaus com ua sala tà fisioteràpia e ua tà estimulacion cognitiva, atau coma espacis de minjador enes plantes.

Aguesta darrèra fasa inclodís tanben era reforma exterior, que prevé milhorar era foncionalitat deth pati exterior des residents, en tot configurar un petit passeg en sector propèr ar arriu e un espaci d’estada ena zòna deth cant der edifici que, ath madeish temps, facilite era accessibilitat per part des veïcles d’assisténcia. Atau madeish se contemple era crompa deth mobiliari  interior. Era inversion prevista ei de 315.000€ entara òbra e d’ath torn de 350.000€ entath mobiliari.

Era sindica d’Aran, Maria Vergés, manifestaue que “damb aguesta darrèra fasa poderam ja compdar damb un equipament que sabem qu’ei de besonh e demorat pera populacion, mès qu’a calut reformular e adaptar ara realitat e ara normativa” e higie que “amassa damb eth Servici d’Atencion en Entorn Domiciliari, era Val d’Aran compdarà ja damb tota ua cartèra de servicis especifics tara gent grana deth territòri que les permete, ad eri e as sues familhes, garantir era sua qualitat de vida”.

Era residéncia, qu’aurà ua capacitat entà 32 persones, compdarà tanben damb un centre de dia damb capacitat maxima de 25 persones que servirà entà ampliar era capacitat der actuau centre de dia plaçat en Vielha. Atau madeish, damb es donades reaus d’usatgèrs potenciaus, se dauriràn es tres prumères plantes d’aguest equipament entà, en un propèr pas, abilitar es plantes quataua e cincaua entara atencion ara discapacitat e projèctes de supòrt as cuedadors.

Vielha, 6 de mai de 2024