• Conselh Generau e Generalitat an iniciat es trabalhs entara creacion d’aguesta Sala Centrau gràcies ara quau Pompièrs-Emergéncies guanharà efectivitat e s’aproparà era gestion des emergéncies ath territòri, en tot deishar de depéner de forma dirècta dera Sala Centrau de Bombers de la Generalitat plaçada en Bellaterra

Eth passat dijaus, 13 de hereuèr, s’amiaue a tèrme era amassada tecnica entà determinar es passi a seguir tant peth pròpri Conselh Generau d’Aran coma pera Generalitat de Catalunya entà començar a méter en foncionament era Sala Centrau d’Emergéncies d’Aran. En aguesta amassada i èren presents era prefectura e es tecnics informatics de Pompièrs-Emergéncies, er airau de TIC deth Departament d’Interior dera Generalitat, representants dera Xarxa Rescats, eth servici tecnic dera Direcció General de Prevenció, Extinció d’Incendis i Salvaments e era empresa Cellnex.

En aguesta Sala Centrau d’Aran se receberàn totes es alèrtes de proteccion civila, emergéncies e servicis sanitaris extraespitalaris e serà plaçada en edifici deth Centre d’Enterpreses Innovadores (CEI) de Casau, a on s’installarà tanben era prefectura de Pompièrs-Emergéncies.

Segontes declaraue eth Major de Pompièrs-Emergéncies, Manel Bosch: “damb aguest nau servici, es comunicacions ath 112 qu’agen a veir damb era Val d’Aran, en compdes de derivar-se prumèr tara Sala Centrau de Bellaterra e dempús tà Pompièrs Emergéncies, passaràn a arribar directament a d’aguesta centrau” e higie que “aguest cambi supausarà mès efectivitat e aproparà era gestion dera emergéncia ath territòri a compdar deth prumèr moment”.

Aguestes melhores s’amien a tèrme laguens deth marc der acòrd entre eth Conselh Generau d’Aran e era Generalitat de Catalunya entara Gestion Integrau d’Emergéncies en Aran e ei previst qu’aguesta Sala Centrau d’Aran entre en foncionament pendent eth prumèr trimesadèr de 2021.