• Aguest espitau de campanha se place damb er objectiu de facilitar eth trabalh assistenciau enes airaus d’urgéncies, que patís limitacions d’espaci de hè fòrça temps, ath temps que servirà coma endret de trigatge de persones damb simptomatologia compatibla damb COVID-19

Pendent aguest maitin efectius de Pompièrs Emergéncies an procedit a installar ath cant der Espitau Val d’Aran ua unitat PMA entà facilitar eth trabalh assistenciau en airau d’urgéncies, fòrça mancat de lòc, e guanhar espacis entà poder amiar a tèrme eth triatge de persones damb simptomatologia compatibla damb eth COVID-19.

Era conselhèra d’Igualtat, Salut e Benèster deth Conselh Generau d’Aran, Maria Vergés, a declarat que “era installacion d’aguesta infraestructura pretén liberar determinadi espacis der espitau entà poder compatibilizar, damb totes es garanties, era activitat assistenciau ordinària e era activitat assistenciau relacionada damb eth COVID-19” e higie que “era incidéncia de casi positius en Aran en aguesti moments non ei nauta, totun, eth plan de contingéncia dessenhat en mes de març seguís vigent e s’a considerat avient aguesta installacion entà aleugerir era manca d’espaci en urgéncies”.

Actuaument, deth 15 d’agost ençà, s’an confirmat cinc casi, des quaus quate an relacion entre eri. D’aguestes cinc persones, dues demoren ingressades en Espitau Val d’Aran en situacion establa e es auti tres son en isolament domiciliari.