• Damb er objectiu de balhar supòrt entà conciliar era vida familhara as pairs, mairs e/o tutors legaus de mainadèra d’entre 3 e 12 ans, sociau e laborau, era maxima institucion aranesa met en foncionament eth 24 d’octobre aguest servici

• “Suenha-te. Temps entà Tu” aufrís un espaci segur entà qu’era mainadèra pogue hèr es déuers, liéger e jogar damb acompanhament professionau especializat

Eth Conselh Generau d’Aran meterà en foncionament eth pròplèu deluns, 24 d’octobre, eth sòn nau servici “Suenha-te. Temps entà tu”, qu’ei un servici gratuït que balharà era maxima institucion aranesa as familhes deth nòste territòri entà facilitar era conciliacion familiara.

“Eth principau objectiu deth Conselh Generau d’Aran ei desvolopar accions e politiques que placen as persones en centre e ajuden a melhorar era sua qualitat de vida, e damb aguest objectiu nèish aguest servici”, asseguraue era sindica d’Aran, Maria Vergés, en tot híger que “respon ara volontat de curbir un besonh qu’auem detectat pendent es darrèri tempsi qu’an es familhes araneses”.

A compdar deth 24 d’octobre, es persones en aguesta situacion qu’agen de besonh ua estona tà anar tath mètge, hèr gestions…poiràn contactar damb eth servici a trauès deth corrèu electronic: tempsentatu@aransalut.com (avisant damb aumens 24 ores d’antelacion) e gaudir d’un espaci a on es mainatges e mainades poderàn jogar, hèr es déuers o liéger damb er acompanhament des professionaus deth servici, 2 ores e mieja ath dia damb un maxim de dus dies per setmana.

Eth servici “Suenha-te. Temps entà Tu” s’aufrirà enes dependéncies deth CDIAP (Carrèr Pomaròla 12 de Vielha) de deluns a diuendres de 15 a 20 ores e es dissabtes de 10 a 13 ores.

Vielha, 20 d’octobre de 2022