Vielha, 14 de març de 2018.- Eth passat deluns dia 12 de març, prepausat pera Oficina de Joenessa deth Conselh Generau d’Aran en collaboracion damb era Coordinacion Territoriau de Joenessa de Lhèida, e laguens deth convèni de collaboracion damb era Deputacion de Lhèida, debanèc, a trauès dera Associació Antisida de Lleida, un talhèr sus era prevencion en consum de drògues, adreçat as escolans der INS d’Aran, damb eth títol “Drògues e hèsta, prevencion deth consum de drògues”.

Tant era coordinadora pedagogica der Institut d’Aran, Esther Gatnau, coma Vanessa Cuni, tecniciana dera Oficina de Joenessa, expliquèren qu’enguan crederen convenent, segontes es besonhs des joeni, poder realizar laguens des cicles formatius der INS d’Aran, aguest talhèr informatiu e de prevencion sus eth consum de substàncies.

Er objectiu deth talhèr ei subervier enes situacions restacades damb era hèsta e es joeni, e senhalar mès que mès es drògues recreatives e es conductes associades ath sòn usatge, en tot fomentar enes escolans ua actitud critica deuant era hèsta insana e consumista, en tot dar estrategies e recorsi personaus entà afrontar-se a entorns d’aufèrta e potenciar d’aguesta manèra un òci saludable e solidari.