Vielha, 11 de mai de 2018.- Era Oficina de Joenessa dera Val d’Aran en collaboracion damb es ajuntaments de Les e Bossòst, organize diuèrsi talhèrs d’orientacion sus er usatge d’Instagram e sus acompanhament (Coaching), adreçadi a pairs e mairs, professorat e educadors.

Eth prumèr des talhèrs, sus er usatge d’Instagram, serà eth pròplèu deluns dia 14 de mai tas 18:00 ores ena Escòla Alejandro Casona de Les e anarà a cargue d’Olga Cuevas e Melis, Mastèr en Dinamizacion dera Societat dera Informacion pera UOC e Professora e desenvolupadora de corsi TIC en linha e presenciau.

Instagram ei actuauments eth hilat sociau preferit e mès utilizat pes adolescents. L’empleguen entà penjar fòtos, entà comunicar-se, mès tanben entà comparar e entà difóner era sua vida e era des auti. En tot depéner der usatge que ne hèsquen, pòt a afectar era sua autoestima o es relacions damb l’entorn? Coma pòt afectar er usatge d’Instagram en un futur?

Eth dusau des talhèrs, sus Coaching e coma melhorar er acompanhament as hilhs e hilhes, serà eth dijaus dia 17 de mai tas 17:15 ores ena sala de plens der ajuntament de Bossòst. Eth talhèr-conferéncia anarà a cargue de Maria del Olmo, Psicològa e formadora, damb er objectiu d’aufrir estruments entà favorir eth desvolopament e enfortir es ligams entre pairs e hilhs.

Per aute costat, e tanben eth dia 14 de mai s’amiarà a tèrme un aute talhèr sus Coaching damb es mainatges e mainades dera Escòla Alejandro Casona de Les.

Es talhèrs d’orientacion dera Oficina de Joenessa deth Conselh Generau d’Aran compden damb eth supòrt dera Direccion Generau de Joenessa dera Generalitat de Catalonha e era Deputacion de Lhèida.