• Damb aguesta visita de trabalh, es tecnics deth Conselh Generau an podut conéisher de prumèra man quini metòdes emplegue er Insitut Veterinari de Noruega entà combáter era expansion d’espècies invasores en miei aquatic, pr’amor qu’er equilibri ecologic des nòsti estanhs de montanha se pòt veir alterat pera proliferacion d’espècies  coma eth veiron

Es tecnics de Miei Ambient deth Conselh Generau d’Aran an format part d’ua delegacion tecnica en marc deth projècte LIFE RESQUEALPYR que s’a desplaçat a Noruega entà conéisher de prumèra man es metòdes qu’emplegue er Institut Veterinari d’aguest país entà combàter era expansion d’espècies invasores en miei aquatic.

S’estudie era adaptacion de quauqui metòdes observadi pera possible eradicacion de peishi introdusidi enes estanhs de nauta montanha, coma ei eth cas deth vairon, present en fòrça des nòsti estanhs e que provòque alteracions en fragil equilibri ecologic des estanhs de montanha.

En aguest sens, er Observatòri entath Patrimòni Naturau e era Biodiversitat a publicat aguest video en tot explicar qu’es ecosistèmes des aigües continentaus son es que mès an patit era pèrta de biodiversitat autoctòna enes darrères decades.

Ena delegacion participèc tanben personau deth Parc Naturau deth Naut Pirenèu e deth Consejo Superior de Investigaciones Científicas, atau coma ua representacion dera comunitat de pescadors.