Es òbres consistiràn en assegurar era operativitat dera installacion es 24 ores ath dia, remodelar er interior der actuau angar e eth bastiment d’un nau angar e plataforma de parcatge en un terren adjacent. Aguesta accion serà finançada pera Generalitat, eth Conselh Generau e eth concessionàri e operador principau der elipòrt

Vielha, 2 de hereuèr de 2018.- Eth Departament de Territòri e Sostenibilitat e eth Conselh Generau d’Aran an arribat a un acòrd entà ampliar er elipòrt de Vielha damb er objectiu que pogue èster un referent europèu en aguest tipe d’infrastructures.

Era ampliacion consistirà en assegurar era operativitat dera installacion es 24 ores ath dia, reformar es espacis interiors der actuau angar en zòna de servicis e sala de gestion d’emergéncies e installar un angar e ua plataforma de parcatge en un terren adjacent.

Es trabalhs les finançaràn eth Departament de Territòri e Sostenibilitat, a trauès de Aeropòrts de Catalonha, eth Conselh Generau d’Aran e HabockAviation Group, concesionàri e operador principau der elipòrt. Ei previst qu’es òbres comencen ena primauera e finalizen en estiu.

Era concrecion tecnica d’aguestes accions includís:

• Substitucion e calibracion de balises entà assegurar era operativitat H24.
• Abalisament e eliminacion d’obstacles que supausen ua vulneracion des superfícies limitadores d’obstacles.
• Naua senhalizacion orizontau.
• Transformacion der espaci interior der actuau angar en tot adaptà’c a espaci de servicis.
• Installacion d’un nau angar entara operativitat des elicoptèrs basadi ena infrastructura, pleaments integrat paisatgisticament en entorn e damb capacitat entà tres aparelhs.
• Abilitacion d’ua naua plataforma de parcatge entà elicoptèrs e barrament perimetrau de seguretat dera finca aquerida peth Conselh Generau d’Aran que demorarà incorporada ath conjunt operatiu der elipòrt.

Er elipòrt de Vielha, acuelh actuauments operacions deth Servici d’Emergéncies Medicaus, rescats de montanha, abituallamient e traslat de residus de refugis de montanha, atau coma de trabalhs aeriani en nauta montanha e de vòls toristics de heliesquí. Damb es naues accions previstes se melhorarà era sua capacitat entà dar contunhitat ad aguestes operacions e acuélher d’autes naues.

Entath secretari d’Infrastructures e Mobilitat, Ricard Font, “damb aguesta accion non solaments melhoram era operativa der elipòrt mès modernizam era installacion e generam mès activitat economica”.