Vielha, 17 de març de 2017.- Era conselhèra de Torisme deth Conselh Generau d’Aran, Anna Díaz acompanhada des representants de Baqueira Beret participen aguesti dies ena Hèira Salon Destinations Nature deth 16 ath 19 de març en París Expo Porte de Versailles.

Aguest Salon qu’ei dedicat as espòrts ar aire liure e vacances ena natura, ei eth punt d’amassada des amants dera natura e es viatges singulars. Es visitants poderàn descorbir es idèes e conselhs sus senderisme, sendèrs, marcha nordica, passejades a shivau, rotes en biciclèta, tot çò qu’aufrís era Val d’Aran en sason de primauera e ostiu.

Eth Salon qu’arribe enguan ara 33au edicion, preve era assisténcia de mès de 70.000 visitants.

Era participacion de Torisme Val d’Aran e Baqueira Beret en Salon de París, arrespon ara volontat de dar a conéisher era complèta aufèrta de torisme de montanha e d’espòrts ar aire liure dera Val d’Aran.

Anna Díaz, arrebrembèc que “Damb era implantacion deth Sistèma de Torisme Responsable e er aqueriment deth certificat Biosphere, era Val d’Aran auance cap a un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, era quau causa contribuís ath hèt qu’era Val d’Aran sigue ua destinacion toristica basada en respècte dera sua cultura, eth miei ambient e era responsabilitat” 

Díaz a hijut “era Val d’Aran, ei ua destinacion toristica competitiva qu’aufrís servicis de qualitat a quinsevolh perfil de viatgèr”.