Vielha, 26 de març de 2019.- Era Val d’Aran a participat aguesta dimenjada en B-Travel, er ancian Salon Internacionau de Torisme en Catalonha, que s’a celebrat en recinte de Montjuïc de Fira de Barcelona.

Era conselhèra de Torisme d’Aran, Anna Díaz, participèc ena inauguracion deth Salon que coïncidic damb era conselhèra d’Enterpresa e Coneishença dera Generalitat, Àngels Chacón, e eth president deth B-Travel, Jordi Clos; eth director generau de Torisme, Octavi Bono; eth director dera Agéncia Catalana de Torisme, David Font e era directora deth salon, Marta Serra, entre d’autes personalitats.

Era Val d’Aran a participat en B-Travel laguens eth stand dera Agéncia Catalana de Torisme damb er objectiu de contunhar en tot assolidar era demanda toristica deth mercat catalan en tot eth territòri, en tot promòir especiuaments era cultura a l’escasença de 2019 An deth Torisme Culturau.

Era conselhèra d’Enterpresa e Coneishença, Àngels Chacón, expliquèc que “era vision deth salon B-Travel encastre damb es politiques qu’impulsam damb eth Plan Estrategic de Torisme de Catalonha deth Departament d’Enterpresa e Coneishença, orientat a aumentar era despensa, a diversificar era aufèrta e desestacionalizar era arribada de toristes”.

Pera sua part, era conselhèra de Torisme d’Aran, Anna Díaz, soslinhèc que “er eveniment internacionau de torisme mès important de Catalonha ei un bon moment entà dar a conéisher es naues iniciatiues de Torisme Val d’Aran en segment deth torisme familhau, esportiu e d’aventura, atau coma era cada viatge mès importanta aufèrta de torisme culturau e d’auviatge istoric qu’aufrís era Val d’Aran as visitants pendent tot er an”.