Es corredors an entrenat en circuit deth Plan de Beret, a on deman dissabte 19 e eth dimenge 20 de març, disputaràn era grana finau dera Copa deth Mon de Snowboard Cross (SBX) FIS.

 

En aguesta carrèra se decidirà eth podium deth circuit de maximal nivèu mondiau a on pòt estar er esportista espanhòu dera RFEDI, Lucas Eguibar, guanhador dera sason 2014-2015.

 

    Eth president dera REDI, er aranés May Peus, e eth sindic d’Aran, Carlos Barrera.

 

Es 84 snowboarders inscriti realizaràn deman dissabte, 19 de març, enquia dues baishades damb tempsi entà participar ena pròva deth dimenge, 20 de març, a on baisharàn en grops de 4 e es 2 prumèrs de cada manja passaràn ara següenta ronda enquia arribar ara gran finau e ara finau de “consolacion” entà decidir es lòcs deth 1èr ath 8au.

 

 

Eth vicesindic d’Aran e conselhèr d’Espòrts, Luis Carlos Medina, a manifestat “entara Val d’Aran compdar damb ua pròva d’aguest nivèu ei un revulsiu entà mostrar-mos ath mon coma destinacion esportiua de maximal interès. Auer era possibilitat de disputar un campionat deth mon de SBX e ath delà era finau d’aguest campionat ei ua grana oportunitat entà hèr conéisher Baqueira Beret e tota era Val d’Aran as païsi enes quaus d’ua auta manèra non serie possibla, ath delà auem era possibilitat qu’es esportistes deth nivèu de Lucas Eguibar, Laro Herrero e Regino Fernández dera RFEDI poguen competir en casa, un aute hèt que hè mès interessant aguesta modalitat”.

Medina a hijut “sonque podem díder qu’eth Snowboard, Baqueira Beret era Val d’Aran èm de enorabona per poder acuélher aguesta pròva. Er esfòrç de totes es persones que trabalhen ac merite”.

 

       Laro Herrero e Regino Fernández dera RFEDI

 

Autobusi enquia Beret

Era organizacion deth Campionat deth Mon de SBX meterà servici d’autobusi enquiath Plan de Beret es dies 19 e 20 de març. Eth servici a connexion en Baqueira damb es rotes deth transpòrt intèrn dera Val d’Aran. Oraris:

Dissabte, 19 de març
Baqueira – Beret 8:30 ores
Baqueira – Beret 9:30 ores
Beret – Baqueira 15:00 ores

Dimenge, 20 de març
Baqueira – Beret 10:30 ores
Baqueira – Beret 11:30 ores
Beret – Baqueira 15:00 ores

 

    Lucas Eguibar dera RFEDI

 

Un Village ena mèta damb fòrça animacion

Entath diuendres d’entrenaments, eth dissabte de classificatòries e es finaus deth dimenge, ei tot dessenhat pr’amor qu’es espectadors que vagen tad eveniment gaudisquen d’ua autentica hèsta. Entad açò s’an preparat diuèrses activitats e animacions paralleles u’auràn lòc en un Village plaçat a pè de pistes en Plan de Beret. Poderàn trobar-se enquia dotze carpes de diferentes mèrques entà mostrar ath public es darrères nauetats en materiau e tanben serà ua excellenta oportunitat entà dar conéisher er inigualable entorn qu’entornege era estacion: era beutat deth païsatge, era riquesa deth patrimòni romanic e es exquisideses dera sua gastronomia, atau coma es multiples e atractiues opcions d’après-ski. Des deth village se divulgaràn es diferentes rotes e lòcs entà visitar e s’aufriràn productes dera marca de garantia Val d’Aran, atau coma ua mòstra des plats tipics dera codina aranesa.

 

Membres dera organizacion deth village, Jesús Bocos (Baqueira Beret) e Montse Viló (Torisme Val d’Aran)

 

Atau madeish, en tot coïncidir damb era finau dera Copa deth Mon de Snowboard eth dissabte, 19 de març, aurà lòc ua naua edicion d’Era Òlhada en village (Plan de Beret) a on se poderà degustar eth plat mès tradicionau dera Val d’Aran, era òlha aranesa.

E entà méter punt finau ar eveniment, eth dimenge a compdar des 14:30 en Village se celebrarà era hèsta de clausura damb un DJ convidat e fòrça mès suspreses!

 

Era conselhèra de Torisme e Desvolopament Econòmic d’Aran, Anna Díaz, damb Lucas Eguibar dera RFEDI.

 

 

Programa

Dissabte, 19 de març de 2016

9:00 ores: Dubertura de telesères
9:30 ores: Inspeccion de pista e entrenaments
A compdar des 10:00 ores dubertura deth Village entath public damb musica, mèrques deth sector e stands de minjar
10:45 ores: Inici classificatòria masculina
13:30 ores: Inici classificatòria femenina
18:30 ores: Reünion de capitans d’equipa

Dimenge, 20 de març de 2016

9:00 ores: Dubertura de telesères
A compdar des 10:00 ores dubertura deth Village entath public damb musica, mèrques deth sector e stands de minjar
10:45 ores: Inspeccion de pista
11:45 ores: Entrenaments
12:45 ores: Inici des finaus
14:00 ores: Ceremònia de liurament de prèmis
14:30 ores: Hèsta de clausura dera Copa deth Mon en Village de mèta damb DJ

 

Vielha, 18 de març de 2016

 

Conselh Generau d’Aran: Núria Sanjuan