Eth conselhèr Chakir el Homrani e eth sindic d’Aran, Carlos Barrera, an signat aué un acòrd entà ampliar es mejans traspassadi ath Conselh Generau d’Aran en matèria d’accion sociau
Eth conselhèr de Trabalh, Ahèrs Sociaus e Familhes dera Generalitat de Catalonha , Chakir el Homrani, e eth sindic d’Aran, Carlos Barrera, an signat aguest maitin un acòrd d’ampliament des mejans traspassadi pera Generalitat ath Conselh Generau d’Aran en matèria d’accion sociau. A trauès d’aguest acòrd, era Generalitat garantís eth foncionament e manteniment des naues places residenciaus e d’atencion diürna que se meteràn en marcha un còp daurida per part deth Conselh era naua residéncia e centre de dia entà gent grana deth Baish Aran plaçada en Les.
Eth conselhèr Chakir el Homrani a explicat qu’ “eth Departament aportarà 452.301 èuros entath manteniment de 30 places residenciaus e 10 de centre de dia, que se transferiràn a compdar dera entrada en foncionament deth nau equipament”. El Homrani tanben a soslinhat qu’aguest acòrd “ei un reconeishement ara singularitat e as competéncies deth Conselh Generau d’Aran en matèria d’accion sociau”.
Eth conselhèr a afirmat qu’accions coma aguestes contribuïssen a garantir “un envielhiment de quilomètre zèro”. “Eth hèt qu’aguesta naua residéncia sigue en Les e non centralizada en Vielha hè possible qu’es persones granes deth Baish Aran poguen envielhir apròp deth sòn entorn personau e comunitari”, a hijut el Homrani.
Eth sindic d’Aran, Carlos Barrera, a manifestat “aguesta ei era filosofia qu’aplique eth Conselh Generau d’Aran damb d’autes inversions pròpries damb er objectiu d’arténher un vertadèr reequilibri territoriau”. En un encastre fòrça diferent ath sociau, Barrera a arrebrembat eth bastiment deth Parc de Visualizacion de Fauna (Aran Park) en Portilhon e fòrça prop de Bossòst.
Per un aute costat, er acòrd tanben preve un ampliament dera dotacion economica destinada ath Servici d’Atencion Domiciliària (SAD) que s’aplicarà a mesura qu’eth Conselh Generau d’Aran tanben aumente era prestacion d’aguest servici.
Vielha, 17 de gèr de 2019
Conselh Generau d’Aran: Núria Sanjuan