Es Agents de Miei Ambient deth Conselh Generau d’Aran se desplacèren entara zòna en tot verificar eth hèt e iniciar sus eth terren era recèrca de tralhes que podessen determinar es possibles causes dera mòrt des animaus

S’està redactant er Informe apertient acompanhat de tota era documentacion fotografica des 16 shivaus mòrti atau coma es fotografies des excrements e des lòcs a on s’an trobat.

Ager dimèrcles, dia 30 de junhsèga, es agents de Miei Ambient deth Conselh Generau d’Aran arreceberen un avís des pagesi proprietaris des animaus que pasturen ena montanha de Peirahita, TM de Canejan, qu’auien trobat 16 exemplars de shivau mòrti ath pè d’un barranc (9 egües e 7 potros).

Un còp arrecebut er avís, es agents de Miei Ambient se desplacèren entara zòna en tot verificar eth hèt e en tot iniciar sus eth terren era recèrca de tralhes que podessen determinar es possibles causes dera mòrt des animaus.

Aguesta minuciosa recèrca sus eth terren (pastures de nauta montanha) aué dijaus, dia 31 de junhsèga, a dat coma resultat era localizacion d’excrements d’os a ua distància de 15 mètres des rèstes des shivaus mòrti.

Un aute hèt a tier en compde coma possible causa d’aguest accident ei qu’era rèsta de shivaus, un ramat de oelhes d’un vesin de Canejan e un ramat de vaques, proprietat d’ua vesia francesa, an abandonat aguesta zòna de pastura. Aguest comportament soent ei indicatiu dera preséncia der os ena zòna.

En paraules deth conselhèr d’Agricultura, Ramaderia e Medi Naturau d’Aran, Jose E. Arró, “es agents de Miei Ambient deth Conselh Generau d’Aran se trapen redactant er informe apertient acompanhat de tota era documentacion fotografica des 16 shivaus mòrti atau coma es fotografies des excrements e des lòcs a on s’an trobat”.

Arró a ahijut “d’acòrd damb eth protocòu establit peth seguiment der os en Pirenèu, aguesti excrements seràn analisadi entà determinar a quin exemplar d’os correspón.”