• Era visita s’emmèrque laguens deth projècte de gestion forestau que trabalhe eth Conselh Generau d’Aran amassa damb ajuntaments aranesi e qu’ei tanben en relacion damb eth projècte “Hilats de Calor Sostenibles en Pirenèu” impulsat peth Centre de Sciéncia e Tecnología Forestau dera Generalitat de Catalonha, damb eth supòrt deth Ministèri tara Transicion Ecologica e Rèpte  Demografic (MITECO), en Sud-Tiròl (Itàlia).

• Damb aguest viatge, es representants aranesi an podut interactuar damb representants municipaus deth Sud Tiròl, entà conéisher de prumèra man eth sòn projècte de hilats de calor, qu’ei dejà consolidat, en un territòri damb ua realitat semblanta ara que se pòt trapar ena Val d’Aran.

Eth conselhèr d’Infraestructures e Òbres deth Conselh Generau d’Aran, José Luis Boya, amassa damb representants des ajuntaments qu’an podut desplaçar-se enquia Itàlia, eth de Vielha e Mijaran, damb era còsso Vanessa Fandiño, e eth d’Es Bòrdes, damb era alcaldesa Rosa Mirat, a viatjat entath Sud-Tiròl (Itàlia), ena region de Bolzano- Naut Adige, tà participar ena prumèra trobada deth projècte “Hilats de Calor Sostenibles en Pirenèu” impulsat peth Centre de Sciència e Tecnologia Forestau de Catalonha damb eth supòrt deth Ministèri tara Transicion Ecologica tath Rèpte  Demografic (MITECO) e que s’emmèrque en projècte de gestion forestau dera Val d’Aran.

Eth conselhèr, José Luis Boya, a manisfestat: “en aguestes jornades auem coneishut de prumèra man ua realitat semblanta ara nòsta pr’amor des similituds territoriaus en aprofitament forestau dauant eth cambi climatic”. E a remercat: “aguesta visita mos servirà de guida entà desvolopar era nòsta estratègia entà descarbonizar e impulsar energies renauibles coma era produsida pera biomassa”.

Des deth Conselh Generau d’Aran ja hè temps que se trebalhe en ua huelha de rota ath torn dera transformacion energetica entar usatge de biomassa, tant enes organismes estataus coma enes ajuntaments aranesi. Eth cas mès recent ei eth deth cauhatge a trauès d’aguest sistèma, der Espitau Val d’Aran e part dera Residéncia Sant Antòni, que damb dues caudères que foncionen de manèra independenta, corbís eth consum des dues installacions.

Vielha, 23 de junh 2024