Deth 4 ath 7 d’octobre La Seu d’Urgell e Andorra acuelheràn ua naua edicion des Jòcs Specials Olympics, er eveniment esportiu mès important entà persones damb discapacitat intellectual que se celèbre cada 4 ans.
Aguesta madeisha tarde se celebrarà era Hèsta Inaugurau en Andorra, ua gala que serà retransmesa en dirècte pera television tàs 20h00.
Des der an 2007 ADDA (Associacion de Discapacitats d’Aran) forme part d’ACELL (Federació Catalana d’Esports per a Disminuïts Psíquics) e toti es usatgèrs d’ADDA estan federadi. ACELL ei ua entitat sense ànim de lucre qu’a coma principau objectiu melhorar era qualitat de vida deth collectiu e fomentar era sua inclusion a trauès der espòrt e deth léser.
ACELL seguís era filosofia deth moviment internacionau SPECIAL OLYMPICS, qu’acuelh ath major numerò d’esportistes damb discapacitat intellectual de tot eth mon, a on er esportista ei çò de mès important e er espòrt ei er esturment entà transméter valors, en tot garantir qu’es esportistes gaudissen d’ua competicion digna, justa e equilibrada.
Aué dijaus, dia 4 d’octobre, 8 esportistes aranesi d’ADDA an marchat tà Andorra tà participar enes Jòcs Specials Olympics La Seu d’Urgell- Andorra deth 4 ath 7 d’octobre de 2018 damb eth desir de gaudir ath maximal d’aguest eveniment esportiu unic.
Es nòsti esportistes participaràn ena categoria d’atletisme.
Aguest eveniment se celèbre cada 4 ans, enguan ac hè jos eth lèma: “ETH MELHOR EI QUI AC SAGE”, e compdarà damb era participacion de 1.500 esportistes, e ja son mès de 13 païsi qu’an confirmat era sua assisténcia. 1.239 esportistes son catalans, 93 der estat espanhòu e 54 d’Andorra, e 114 son esportistes de 13 delegacions diferentes, entre es quaus: Belgica, Finlàndia, Portugal e Alemanha.
Aguesta madeisha tarde se celebrarà era Hèsta Inaugurau en Andorra, ua gala que serà retransmesa en dirècte pera television tàs 20h00.
Eth diuendres 5 d’octobre se realizaràn es pròves de temps e eth dissabte serà era jornada de carrères e medalhes.
Eth dissabte dempús deth sopar, ADDA assistirà ena hèsta des esportistes, damb toti eri, ath delà des tecnics, volontaris e organizacion. E fin finau, eth dimenge, dempús d’assistir ara Clausura des Jòcs en La Seu d’Urgell, vieràn de nau cap a casa.
Ath delà dera competicion esportiua compdaràn damb fòrça activitats complementàries de léser e jòcs. S’organizaràn activitats de léser, damb caractèr ludic e recreatiu ath torn des installacions esportiues. S’organizarà era Hèira des Jòcs, coma un espaci damb activitats diuèrses de léser, culturaus e associatives, daurit ara poblacion en generau des dues sedences e as participants des jòcs.
Damb era collaboracion de Special Olympics España, compdaràn tanben damb eth Programa de Salut, a on es esportistes poderàn realizar diferentes revisions medicaus gratuïtes.
Vielha, 4 d’octobre de 2018
Conselh Generau d’Aran: Núria Sanjuan