• Pendent eth passat 2019 es musèus d’Aran celebrauen er an dera memòria, tematica ath torn dera quau an virat es activitats realizades

2019 siguec er “An dera Memòria” enes en Hilat de Musèus dera Val d’Aran, deth Conselh Generau d’Aran. Per aguest motiu, es accions amiades a tèrme auien coma objectiu recuperar tèmes deth passat entà méter-les en valor e dar-les a conéisher de forma divulgativa as visitants.

Dejà hè quauqui ans que Musèus Val d’Aran apòste pes tematiques annaus, çò que permet crear un hiu conductor e nèxe entre es activitats. Ath delà, garantís era fidelizacion deth public locau.

Aument de visitants

En conjunt, era chifra de visitants de toti es equipaments en 2019 a estat de 21.481, en tot superar en 571 era de 2018. Es musèus mès visitadi, coma ei abituau pr’amor que daurissen tot er an, an estat Sant Joan d’Arties, glèisa e sala d’exposicions temporaus (5.016), seguit deth Musèu dera Val d’Aran (4.816) e der Ecomusèu çò de Joanchiquet (4.143). Aguest darrèr a estat eth musèu que mès visitants a guanhat respècte der an anterior, damb ua diferéncia positiva de 812 visitants.

Eth sindic d’Aran, Francés Boya, afirme que: “auem era sòrt de compdar damb equipaments culturaus descentralizadi en territòri, que permeten explicar era istòria, evolucion e identitat dera Val d’Aran, des de diuèrsi àmbits e damb lectures complementàries”.

Activitats pendent tot er an

Damb eth lèma “Musèus d’Aran tot er an”, eth Conselh Generau cerque aufrir era cultura coma esturment entà combàter era estacionalitat e non limitar era aufèrta museistica sonque as epòques de maxima afluéncia toristica.

Ua des estrategies entà sajar d’artenhe’c ei era dinamizacion des musèus a trauès de disparières activitats. En 2019, es actes organizadi per Musèus Val d’Aran an arribat as 1.714 participants, ua chifra fòrça superiora ara de 2018 (515 visitants).

En totau, s’an amiat a tèrme 23 activitats diferentes, finançades en gran part gràcies ara subvencion destinada a musèus concedida peth Departament de Cultura dera Generalitat de Catalunya, er Institut d’Estudis Ilerdencs dera Diputació de Lleida e damb eth hons dera Junta d’Herències dera Generalitat de Catalunya. En çò que respècte as activitats dera glèisa de Sant Joan d’Arties, tanben s’a compdat damb eth supòrt der Ajuntament de Naut Aran.

Des 23 activitats, 10 se realizèren en aire liure, ua formula entà apropar es musèus ara comunitat, en tot gésser des pòrtes deth musèu entà dehòra, coma siguec eth cas dera mòstra d’arts e oficis en pati exterior de Sant Joan d’Arties en Setmana Santa, damb mès de 600 visitants.

Es exposicions temporaus

Es exposicions temporaus garantissen qu’es visitants que dejà coneishen es musèus poguen contunhar visitant aguesti equipaments damb naui contenguts. Un totau de 7.481 visitants en 2019 an podut gaudir des disparières exposicions, repartides entre Sant Joan d’Arties, eth Musèu Val d’Aran e, coma nauetat, en ua des bòrdes de Joanchiquet, adaptada coma sala d’exposicions.

Eth succès des setmanes tematiques

Ua auta des nauetats an estat es setmanes tematiques, damb contenguts vinculats ath territòri, qu’an permetut que, ath long de diuèrsi dies, s’agen tractat tèmes de manèra teorica e practica. Ua d’aguestes a estat era “Setmana de Bruishes”, ath torn dera exposicion “Se’n parlave i n’hi havie”, sus era bruisheria en Pirenèu e tèrres de Lhèida, que compdèc damb conferéncies, talhèrs, visites teatralizades, projeccions e un concèrt ar aire liure, un “Akelarre musicau”.

Naui rèptes entà 2020

Enguan, era tematica escuelhuda ei er “An des Croniques”, de manèra que, a compdar deth rebrembe deth passat, pogam préner consciéncia dera realitat deth present. Dejà s’an premanit es activitats enquia Setmana Santa, des que s’anaràn hènt difusion enes hilats sociaus e tanben se pòden trapar laguens des oraris d’iuèrn.

Coma gran nauetat, era Mina Victòria presentarà un centre d’interpretacion renauit, damb naua museografia, contenguts e didactica. Ath delà, era energia consumida en aguesta infraestructura provierà der usatge d’hònts sostenibles.