Naut Aran, 22 de junhsèga de 2016.- Coma cada an des de hè 17 consecutius, era Associacion Espanhòla Contra eth Càncer de Lhèida, damb eth supòrt dera Junta Locau dera Val d’Aran e era collaboracion deth Conselh Generau d’Aran, a organizat es colònies d’ostiu entà mainatges qu’an sofrit ua malautia oncologica, pendent ua setmana ena Val d’Aran.

Eth Conselhèr de Planificacion Territoriau e baile de Naut Aran, Cesar Ruiz Canela, a visitat as participants en aguestes colònies que son ua iniciatiua pionèra en tot er Estat.

100 mainatges e joens d’entre 7 e 17 ans, procedenti de diuèrsi punts dera geografia espanhòla (Canàries, Andalosia, Aragon, Madrid e Catalonha), se lòtgen ena Aubèrja Era Garona de Salardú, e realizen pendent tota era setmana activitats coma rafting, talhèrs de teatre, espòrts, montar a shivau, en tot crear un espaci d’òci e temps de léser a on es mainatges e joens agen era possibilitat de víuer ua experiéncia gratificanta.

Es colònies, que coma totes es activitats que s’amien a tèrme des dera AECC- Lhèida son gratuïtes, compden damb ua equipa de 40 persones entre monitors, coordinadors, responsables e volontaris, dirigit per Eva Figuera, gerenta dera AECC-Lhèida e Carles Giné, director des colònies, era coordinacion de Dolors Zapata e eth supòrt psicologic de Jordi Arjó.

Eth Conselhèr Cesar Ruíz Canela, a destacat era collaboracion mutuau entre era AECC-Lhèida e eth Conselh Generau d’Aran, pera importància qu’a que pendent tanti ans seguidi era Val d’Aran sigue era destinacion d’acuelhuda de toti aguesti mainatges e joeni, e manifestèc er interès per part deth Govèrn d’Aran de seguir en tot mantier e ampliar aguest ligam damb era Associacion Espanhòla Contra eth Càncer de Lhèida.