• Era “Corsa e caminada des 15 pòbles”, qu’enguan celèbre era sua XIXau edicion, aurà lòc eth 30 d’agost.

Era conselhèra de Torisme e Desvolopament Economic d’Aran, Anna Díaz, e eth president des Volentaris d’Aran, Roberto Boya, an signat un an mès eth convèni de collaboracion entà qu’es Volentaris d’Aran organizen era “Corsa e caminada des 15 pòbles” que se celebrarà eth dia 30 d’agost.

Era conselhèra, Anna Díaz, a manifestat,“eth compromís deth govèrn aranés ei promòir eveniments esportius ja consolidats qu’ath madeish temps, transmeten valors coma, en aguest cas, era conservacion deth patrimòni”.

Aguest convèni establís qu’es Volentaris d’Aran introdusiràn en totes es comunicacions dera Corsa era marca “Val d’Aran Esséncia des Pirennèus”, er idiòma oficiau serà er aranés e se relacionarà era Corsa damb bèri aspèctes der hèt diferenciau occitan (aranés en Aran), tanben suenharàn entà qu’era participacion aumente en relacion damb es darrères edicions e eth Conselh Generau d’Aran collaborarà ena difusion e balharà supòrt econòmic ara organizacion.

“Des des Volentaris d’Aran consideram qu’era Corsa des 15 pòbles ei fòrça important entath país tant a nivèu esportiu coma toristic e patrimoniau” a soslinhat eth president des Volentaris d’Aran, Roberto Boya.

Era “Corsa e caminada des 15 pòbles”, qu’enguan celèbre era sua XIX edicion, a ua distància ei de 21,190m çò que correspon a un recorregut de mieja maraton. Eth desnivèu positiu dera còrsa ei de 1.300m e eth negatiu ei de 1.200m.

De tot biais, eth recorregut compde damb tres opcions mès:

– Caminada 19 km damb 900 m de desnivèu positiu e 800 m de desnivèu negatiu.

– Era caminada 5 km damb 100 m de desnivèu positiu e 200 m de desnivèu negatiu.

– Corsa Juvenila entàs neishudi en 1998 e següents damb eth madeish recorregut qu’era Caminada 5 km.

“Era Corsa des 15 pòbles potencie eth senderisme ena Val d’Aran, atau coma permet gaudir d’ua rota de trekking combinada damb era visita pes pòbles d’Aran e, degut ara sua elevada participacion, hè difusion dera Val d’Aran e a mès collabore ena desestacionalizacion deth torisme. Atau donques, aguesta corsa a passat a formar part deth patrimòni naturau e istoric dera Val d’Aran” a hijut era conselhèra, Anna Díaz.

Mès informacion e inscripcions: www.corsa15pobles.org.