Eth sindic d’Aran, Carlos Barrera, e eth representant de Cáritas Diocesana d’Urgell, Mossen Pere Balagué, an signat un convèni de collaboracion entara intervencion sociau des familhes desfavorides e en risc d’exclusion sociau. Er acte a compdat tanben damb era assisténcia dera directora de Caritas Vielha, Susana Argelich.

En paraules deth sindic d’Aran, Carlos Barrera: “Eth Govèrn d’Aran, en vertut des sues competéncies, desvolope diuèrses activitats e programes en favor des collectius afectadi per desparièrs problèmes en sector des servicis sociaus. Damb aguest convèni volem garantir poder ajudar a tota era gent dera Val d’Aran qu’ac age de besonh”. Barrera a soslinhat era estreta collaboración entre eth Departament de Salut e Benéstar d’Aran e Caritas.

Cáritas Diocesana d’Urgell ei ua entitat sense interès lucratiu fòrtament arraïtzada en Aran. Es sues activitas son de caractèr benefic e assistenciau, e constituïssen un supòrt entàs collectius mès desfavorits, un des sòns principaus compromisi e preocupacions, en tot sajar d’evitar que s’arribe a situacions de necessitat e marginacion, ena mesura que sigue possible.

Damb eth convèni signat aué, eth Conselh Generau d’Aran apòrte 10.000€ en vertut dera prevision hèta referent as activitats que desvoloparà Cáritas Diocesana d’Urgell pendent tot er an.

Vielha, 20 de gèr de 2017

Conselh Generau d’Aran: Núria Sanjuan