Luis Carlos Medina, vicesindic d’Aran e conselhèr d’Espòrts, amassa damb Anna Díaz, conselhèra de Torisme e Desvolopament Economic d’Aran, an signat un an mès un convèni de patrocini damb es esportistes professionaus aranesi: Aymar Navarro, Álex Puente, Ruben Caseny e Tòn Cónsul, entà pr’amor de promòir era destinacion toristica esportiua Val d’Aran peth mon mejançant eth patrocini institucionau.

Damb aguest convèni de patrocini, es esportistes aranesi enes desplaçaments e “stages” auràn de portar enes equipaments e ròbes de descans es logotips de Foment Torisme Val d’Aran “Val d’Aran era esséncia des Pirèneus” e Conselh Generau d’Aran, ath delà de portar-les ena ròba de competicion, cada viatge qu’era nòrma e eth reglament des equips ac permeten.

Enes ròdes de premsa, eveniments jornalistics o esportius mediatics, portaràn eth logotip “Val d’Aran era esséncia des Pirèneus” e Conselh Generau d’Aran, atau coma es veïculs qu’utilizen es esportistes entàs desplaçaments e assisténcies as competicions, auràn de portar eth madeish logotip.

• Aymar Navarro Combalié, esquiador professionau “freeride” de categoria internacionau World Freeride Tour (WFT/WFQ) çò que li permet tanben participar en pròves nacionaus e internacionaus de prumèr nivèu peth mon, a soslinhat “era Val d’Aran ei un paradís entà practicar quinsevolh espòrt que, mès en especiau entàs practicants coma jo deth freeride non te l’acabes”. Ath delà, Navarro a hijut “ei un orgulh representar ara Val d’Aran e, que melhor que representar e que t’ajuden.”

• Álex Puente Tasias, ei esquiador professionau membre dera equipa dera RFEDI, corredor Olimpic (Sochi 2014) d’esquí aupin. Participe en pròves nacionaus e internacionaus de prumèr nivèu. “Ei ua ajuda fòrça important, a mès d’un aunor representar ath mèn país, Aran, a on i vage a competir” a soslinhat Puente.

• Ruben Caseny Catalá, ei ciclista damb licéncia e corredor d’esquí nòrdic professionau, membre dera equipa internacionau MASSI- KUWAIT CYCLING PROJECT. “Ei ua grana motivacion que t’ajuden entà tirar entà deuant, pr’amor que tot some. Me senti fòrça orgulhós qu’eth mèn país me dongue supòrt e ath madeish viatge poder representar-lo” a manifestat Caseny pendent era signatura.

• Tòn Cónsul Vivar, ei patinador professionau junior ISU, çò que li permet participar en pròves nacionaus e internacionaus de prumèr nivèu peth mon, de patinatge artistic sus gèu. En paraules de Tòn, “representar ath mèn petit país, era Val d’Aran, ei tot un orgulh entà jo, açò encara te da mès fòrces entà contunhar lutant.”

Eth vicesindic d’Aran e conselhèr d’Espòrts, Luís Carlos Medina, a soslinhat: “Encara qu’es recorsi economics tostemp son limitadi, des deth Govèrn d’Aran tostemp èm dauridi a ajudar as esportistes aranesi enes sues carrères cap ar exit. Ei un orgulh e ua sòrt poder ajudar ad aguesti joeni esportistes aranesi Tant Aymar, coma Álex, Ruben e Tòn, son un exemple tàs nòsti joeni”.

Medina a arregraït tanben er esfòrç que hèn es familhes des esportistes.

Pera sua part, era conselhèra de Torisme e Desvolopament Economic d’Aran, Anna Díaz, a soslinhat: “Ena Val d’Aran torisme e espòrt van dera man e ei un orgulh qu’es nòsti esportistes ath delà de competir en mès naut nivèu poguen dar a conéisher era nòsta destinacion toristica”.

Eth Conselh Generau d’Aran pagarà, en concèpte de patrocini, era quantitat de 3.000€, a cadun des quate esportistes aranesi.

Vielha, 14 de gèr de 2017

Conselh Generau d’Aran: Núria Sanjuan