Er snowboarder deth Club Aranés Espòrts d’Iuèrn (CAEI), Oriol Filella, obtenguec ua dusau posicion ena prumèra des quate pròves que formen eth Freeride World Tour Junior e que se celebrèc en Baqueira era passada dimenjada.

Filella participèc ath costat des sòns companhs d’equipa, Guilhem Berini e Iker Vidal.

Ar eveniment anèren snowboarders de diferentes nacionalitats, francesi, canadians, espanhòus e andorrans; açò dèc un punt de major qualitat ara competicion en tot incrementar era competitivitat entre es riders.

Pendent eth dia anterior ara pròva podérem realizar un clinic generau sus seguretat en terren de lauegi ath delà d’ues practiques ena zòna d’Orri de maneig de sonda, pala e A.R.V.A.

Dissabte, 28 de gèr, era fauta de visibilitat non mos permetec realizar eth reconeishement enes melhores condicions mès, gràcies as pins deth sector deth Saumet e eth relèu que mos aufrís eth sòn bòsc, se podec reconéisher era cara a on se disputarie era competicion londeman.

Eth dimenge, 29 de gèr, claregèc damb un solei radiant, que mos facilitèc realizar es rondes pendent tot eth dia en perfèctes condicions.

Es lèu 20 cm de nhèu enregistrada pendent es 24 ores anteriores ara competicion, deishèren ues condicions mès qu’acceptables en sector de Saumet tan castigat prèviaments peth vent.

Es tres raiders júniors dera seccion de snowboard deth CAEI realizèren bones linhes ena sua prumèra participacion en ua pròva deth Freeride World Tour Junior.

Guilhem Berini e Iker Vidal desvelhèren era atencion entre eth public enes sues linhes, en tot apostar per baishades damb compromís laguens deth sector, encara que fin finau ambdues caigudes empediren era pujada ath pòdium.

Oriol Filella acadièc ua linha damb fòrça fluïdesa, contròl e velocitat, en tot includir elements d’aire coma ollies e sauts que lo deishèren as pòrtes dera victòria.

Vielha, 2 de hereuèr de 2017

Conselh Generau d’Aran: Núria Sanjuan

Hònt e foto: CAEI