• Er “Ecocentro Bioleta” a estat un des projèctes seleccionadi entà aguesta iniciativa de micromecenatge qu’a coma objectiu ajudar a finançar projèctes damb retorn sociau enes territòris deth Naut Pirenèu e Aran

Era passada tardor s’anoncièc era convocatòria pilòt de finançament collectiu de projèctes damb retorn sociau ath territòri, “Matchfunding Arraïtza-te Naut Pirenèu e Aran”. Ua convocatòria de finançament collectiu mixta, en quau es administracions publiques complementen es aportacions dera ciutadania a trauès deth micromecenatge.

Ena prumèra edicion deth projècte de matchfunding Arraïtza-te se comde damb un hons public de 24.000 euròs entà activar un totau de sies projèctes, un de cada territòri deth Naut Pirenèu e Aran.

Eth projècte escuelhut ena Val d’Aran a estat er “Ecocentro Bioleta”, un projècte d’alimentacion, corsi, activitats e d’auti productes basat ena sostenibilitat, era ecologia e eth comèrç just e de km0.

Ei previst qu’era campanha de micromecenatge ena que poirà participar tota aquera persona interessada s’inície eth pròplèu 2 de març, e s’amiarà a tèrme a trauès dera plataforma Goteo.org. Es projèctes seleccionadi receberàn supòrt tecnic entà premanir es sues campanhes de micromecenatge e maximizar atau es sòns objectius.

Aguesta iniciativa a estat prebotjada peth Conselh Generau d’Aran e es Conselhs Comarcaus dera Alta Ribagorça, Alt Urgell, Cerdanya, Pallars Jussà e Pallars Sobirà, es servicis de promocion economica e trabalh d’aguestes institucions, es Oficines de Joenessa, er Ateneu Cooperatiu deth Naut Pirenèu e Aran e eth projècte Odisseu, damb eth supòrt dera Deputacion de Lleida, Deputacion de Girona, er Institut entath Desvolopament e era Promocion deth Naut Pirenèu e Aran (IDAPA), era DG de Joenessa, eth Consòrci GAL Alt Urgell – Cerdanya e eth Consòrci Leader Pirenèu Occidentau.