Eth prèmi s’a liurat en marc dera II Jornada deth Club de Torisme Familiar celebrada en Caixaforum de Madrid. Pendent era jornada s’an presentat es resultats deth IV estudi de torisme familiar en Espanha.

Eth jurat a avalorat era informacion adequada as familhes, es accions de promocion fòrça especializades tà captar eth torisme familiar, e era adequacion dera ofèrta deth destin en toti es encastres, lotjament, restauracion e activitats.

Vielha, 6 d’octobre de 2016. Era Val d’Aran a recebut eth prèmi ath destin familiar mès innovador en un acte celebrat en Caixaforum de Madrid, segontes es representants deth jurat se prèmie er esfòrç dera Val tà posicionar-se coma destin tàs familhes, e açò aubedís a quauques accions tant en especializacion dera ofèrta, de tot tipe existent ena Val, coma ena especializacion des accions tà comunicar damb era demanda.

Es Prèmis Torisme Familiar celèbren era sua prumèra edicion enguan damb er objectiu de reconéisher aqueres entitats o empreses distinguides damb eth Sagèth de Torisme Familiar que milhor s’an adaptat as requisits d’excelléncia d’aguest aval, redundant en un benefici tàs familhes. Es auti prèmis autrejadi an estat a Viatges EROSKI ena categoria de “Milhor estratègia de comunicacion e marqueting enfocada a familhes”; Planeta40 ena categoria de “Milhor iniciativa de creativitat e especializacion en familhes”; Vilars Rurals ena categoria de “Milhor lotjament adaptat a familhes damb mainatges”. E tanben s’a dat un prèmi especiau ara localitat de Peñíscola coma destin milhor posicionat entre es familhes pera sua dedicacion ath torisme familiar.

Era Val d’Aran pertanh actuaument ath “Club de Producte de Torisme Familiar” des der an 2013, an qué artenhec entrar coma projècte pilòt amassa damb d’auti 4 destins e empreses. Des d’alavetz eth sagèth de torisme familiar s’a transformat en un Club de Producte Toristic emparat pera Secretaria der Estat de Torisme, e qu’ena actualitat compde damb 115 destins e empreses avalades, encara qu’era Val ei tostemp er unic destin de montanha que pertanh ath club de producte.

Era Federacion Espanhòla de Familhes Numeroses (FEFN) amassa damb DNA Expertus, empresa en qué requè ena direccion tecnica deth sagèth, an presentat ena jornada quauques dades deth IV Estudi de Torisme Familiar en Espanha, eth contengut  des quaus ei d’accès exclusiu tà destins e empreses qu’apertien ath club, totun, an presentat aqueri resultats mès generaus d’interès entà toti.