- Era sindica d’Aran, acompanhada des conselhèrs d’Economia, Torisme e Promocion Economica s’an amassat aguest maitin damb era directora generau de Torisme de Catalunya, damb qui an tractat eth besonh de revisar e actualizar eth convèni deth traspàs de competéncies en matèria de torisme, que date de 1997 e que d’alavetz ençà non a estat modificat
Era sindica d’Aran, Maria Vergés, e es conselhèrs d’Economia, Torisme e Promocion Economica, Juan Antonio Serrano e Josep Canut, an recebut aguest maitin ara directora generau de Torisme dera Generalitat de Catalunya, Marta Domènech, e ath director de Servicis Territoriaus d’Empresa e Trabalh, Vidal Vidal Culleré.
“Era actuau situacion deth Conselh Generau d’Aran per çò que hè ath traspàs de competéncies en matèria de torisme e promocion economica ei fòrça complicada pr’amor que de 1997 ençà non s’a revisat ne actualizat eth convèni que gerís aguest traspàs damb era Generalitat”, a manifestat era sindica d’Aran, “ei per açò que volem arregraïr era visita dera directora generau de Torisme entà conéisher de prumèra man es besonhs e problematiques que trauèsse eth sector toristic dera Val d’Aran, qu’a estat fòrça afectat pera pandèmia pendent aguest darrèr an e miei”
Atau madeish “auem profitat tanben entà tractar es rèptes de futur as qu’a de hèr front eth torisme en nòste territòri, ahèrs tan primordiaus coma eth cambi climatic, era sostenibilitat, era mobilitat o era gestion responsable deth territòri, entre d’auti” explicauen es conselhèrs Serrano e Canut, en tot híger que: “en aguest sens, auem presentat ara secretaria generau de Torisme eth Plan de Sostenibilitat Toristica deth Conselh Generau, un projècte peth quau er estat mos a dotat de 2,5 milions d’euròs e qu’a de servir entà adaptar eth nòste torisme as besonhs actuaus e, sustot, entà esdevier ua destinacion verda e sostenible, qu’apòste pera preservacion deth nòste entorn naturau, mès tanben pera potenciacion deth nòste auviatge culturau, er espòrt, era gastronomia o eth comèrç locau, entre d’auti”.
Ua des prumères accions d’aguest Plan de Sostenibilitat aplicada dejà enguan a estat eth contròl des accèssi ath miei naturau en tot aplicar er usatge des naues tecnologies a trauès dera app AparcAran, mès s’an planificat tanben fòrça autes actuacions en airaus tant importants coma era mobilitat sostenibla, era desestacionalizacion e diversificacion dera aufèrta toristica e era implementacion des naues tecnologies entà auançar enquia ua destinacion intelligenta.
