Pendent aguesta setmana se desplaçarà entara Val d’Aran responsables dera enterpresa Tracsa acompanhadi d’un funcionari dera Confederacion Hidrografica del Ebro entà decidir era melhor solucion tecnica de consolidacion e encauçament dera afectacion que se produsic eth passat 11 de mai ena ribera deth Valarties e qu’actuaments genere era torbulencia der aigua en arriu Garona en tram des d’Arties enquiara termièra francesa.

Aguesta visita ei consequéncia der escrit qu’eth sindic d’Aran, Carlos Barrera, envièc a Maria Dolores Pascual, presidenta dera CHE (Confederacion Hidrografica del Ebro), autoritat idraulica deth Garona, eth passat dia 27 d’agost. En aguest escrit s’informaue ara Confederacion dera greu afectacion que patis er arriu Garona e era fauna icticola coma consequencia dera aportacion de materiaus provinenti d’aguest esbauçament.

Cau arrembrembar, qu’eth passat dia 23 d’agost s’amièc a tèrme ua inspeccion per part deth vigilant dera CHE acompanhat d’un tecnic deth Conselh Generau d’Aran ena zòna afectada, entà qu’eth vigilant podesse constatar era gravetat d’aguesta situacion.

Entath Govèrn d’Aran aguest ei un ahèr de maxima prioritat pera afectacion ecologica qu’aguesta turbelhada produsís ena Garona. Fin finau, eth passat 20 d’agost eth sindic d’Aran dejà demanèc ua reunion damb era presidenta dera CHE entà tractar aguest ahèr entre d’auti.