• Er objectiu d’aguesta visita ère conéisher en prigonditat aguesta installacion e eth sòn profitament toristic entà poder desvolopar un projecte similiar ena comarca deth Sobrarbe

Eth passat deluns, 28 d’octobre, un grop d’autoritats locaus dera comarca deth Sobrarbe e part der equip uman deth Geoparque de Sobrarbe-Pirineos, visitèren era Val d’Aran entà conéisher eth foncionament dera Mina Victòria.

Ena comarca deth Sobrarbe, coma passèc en Aran, tanben se desvolopèc ua importanta activitat minèra, que deishèc ua peada encara visible a dia d’aué, visitable a trauès d’un itinerari geo-minèr. Coma rèpte de futur, se pretenen desvolopar projèctes entà fomentar activitats toristiques e divulgatives entorn as sues mines.

Dat eth clar parallelisme entre es espleites minères d’Aran e es dera zòna de Bielsa e Valle de Chistau, eth motiu dera visita a Mina Victòria siguec poder conéisher damb prigonditat  es installacions, er origen dera mina coma recors toristico-culturau, eth sistèma de gestion e eth foncionament des visites guidades.

Pendent era jornada se compdèc damb era preséncia der alcalde de Bielsa, Miguel Noguero, eth president dera comarca deth Sobrarbe, José Manuel Bielsa, eth coordinador scientific deth Geoparque, Ánchel Belmonte, era tecnica de desvolopament dera comarca, Sonia Sampietro,  e expèrts e academics en geologia, entre d’auti.

Era visita comencèc ena sedença deth Conselh Generau d’Aran, a on sigueren recebudi peth  sindic d’Aran, Francés Boya. Ara seguida, acompanhadi deth geolèg Jordi Gavaldà, e es responsables de Musèus dera Val d’Aran, Carla del Valle e Mónica Rodríguez, se desplacèren enquiara Mina Victòria, on pogueren visitar tot er itinerari circular, era senhalizacion e er interior d’ua des galeries.