Vielha, 1 de junh de 2017.- Un grop integrat per responsables politics deth Govèrn de Chile, tecnicians toristics, guides e empresaris otelèrs e de torisme actiu dera region d’Aysén ena Patagònia, an visitat era Val d’Aran entà conéisher d’apròp era experiéncia e eth trabalh deth Conselh Generau d’Aran e de Torisme Val d’Aran ena gestion toristica dera Val d’Aran.

Era delegacion dera region dera Patagònia chilena, dirigida peth director regionau de Torisme, Cristian Alarcón Mendoza, siguec arrecebuda peth sindic d’Aran, Carlos Barrera, acompanhat dera conselhèra de Torisme, Anna Díaz, qu’expliquèren es caracteristiques deth modèl de gestion toristica dera Val d’Aran.

Eth motiu dera visita ei era similitud entre era Val d’Aran e era region d’Aysén ena Patagonia chilena qu’aufrís atractius toristics de gran valor culturau e patrimoniau, en un entorn naturau unic e qu’a ua extension semblanta a Portugau, ena còsta der Ocean Pacific.