Vielha, 15 de seteme de 2017.- Eth Conselh Generau d’Aran, en collaboracion damb Torisme Val d’Aran e era Societat Catalana de Micologia, organize entre es dies 21 e 24 de seteme era XIau edicion des Jornades Micologiques de Val d’Aran.

Era recèrca e recuelhuda de misharnons ei ua activitat tradicionau fòrtaments arraïtzada ena Val d’Aran. Es cercaires de misharnons e es aficionadi ara micologia creishen an darrèr an en un entorn favorable entara micologia. Per açò, e damb er objectiu de mantier es valors naturaus des ecosistèmes dera Val d’Aran, eth Conselh Generau d’Aran a iniciat diuèrses accions entà qu’era activitat de recuelhuda de misharnons non compromete era produccion e diuersitat des misharnons d’Aran, en tot potenciar era educacion ambientau e eth trabalh scientific.

En marc dera XIau edicion des Jornades micologiques dera Val d’Aran, se poderà participar en diuèrses gessudes ath camp entà conéisher era biodiversitat des misharnons e visitar er espaci d’exposicion eth 23 e 24 de seteme. Aguestes activitats an coma finalitat mostrar era grana riquesa d’espècies micologiques d’Aran.

Era Exposicion de misharnons dera Val de Aran s’amiarà a tèrme es dies 23 e 24 de seteme ena sedença deth Conselh Generau d’Aran.

Encara qu’es activitats des Jornades Micologiques son gratuïtes, ei de besonh inscriuer-se prèviaments, pr’amor qu’es places son limitades a trauès deth Conselh Generau d’Aran Tel. 973641801 o en g.vilo@aran.org . Tanben pòden inscriuer-se a trauès deth servici de preinscripcions a jornades deth PATT deth portau RuralCat www.ruralcat.net/preinscripcionspatt

Cau arrebrembar que des der an 2014 eth Conselh Generau d’Aran, regule era recoleccion de misharnons enes bòsqui dera Val d’Aran a trauès d’ua ordenança que permet que residenti, proprietaris de dusaus residéncies e gent que pernòcte en establiments toristics dera Val d’Aran, poguen recuélher misharnons enes bòsqui sense còst. A tau efècte eth Conselh Generau expedís talonaris enes ajuntaments e lotjaments otelèrs.

Eth reglament, cossent damb era nòrma forestau catalana, aplique sancions que van de leugères, grèus, enquia fòrça grèus en casi de reïncidéncia. Eth Conselh Generau d’Aran a installadi 42 pannèus de senhalizacion enes pistes forestaus entà informar sus era nòrma d’apletadi misharnons en aranés, catalan, castelhan e francés.